كل شي تبين تعرفينه عن ماكينه القهوه من نسبريسو | لما يكون في كوفي شوب ببيتك

السلام عليكم وَ رحمه الله وَ بركاته ،
تدوينتي اليوم عن مكينه قهوه خلتني استغنى عن المقاهي وستاربكس ودكتور كيف وربعهم كلهم!
التدوينه بتكون طويله وبشكل مفصل عن المكينه بشكل عام + انواعها + الكوفي بار + مكينتي بشكل خاص + وشلون تسوون بيرفكت كوب من القهوه + ناخذ نسبيريسو او دولسي قوستو ، متحمسين ؟ يلا نبدا!



شنو يعني مكينه نسبيريسو ؟
مكينه نسبيريسو ببساطه مكينه قهوه تصنع القهوه من كبسولات الاسبريسو الي هو عباره عن قهوه مطحونه بضغط معين ، القهوه تكون محفوظه بكبسولات مثل ماقلت بشكل معين ان لما تستخدمينها تكون كانها مطحونه فريش تشمين ريحه القهوه كآنك بجد بمقهى ، المكينه تسوي كل انواع القهوه وانتي الي تتحكمين فيها ، القهوه ياتكون قويه مع ماي بس او تخففينها بحليب وتقدرين تسوين انواع كثيييره مالها حصر ، في موقهم قسم خاص للطرق والوصفات :

هنا

الي حلو فيه تختارين مزاجك هل هو صباحي او للمسا او بعد العشا ويعطيك وصفات الي تناسبك

الي عندي من نستله وعندهم نوع ثاني الي هي دولسو قوستو وبتكلم عنهم باخر الموضوع.

انواع مكينه نسبريسو :
بموقعهم ١٠ انواع للمكاين :

الاسامي والاسعار موجوده بالصوره ، على اي اساس تختارين المكينه ؟
هل تحبين القهوه مع الحليب لازم تاخذين مكينه فيها حليب ، اذا تحبين الاسبريسو او الدبل شوت ماتحتاجين الحليب ، الانسبيريسو بشكل عام تنفع للي لهم مزاج بالقهوه ويفهمون فيها ويفرقون بالنكهات لان كل مره تستخدمين طريقه تطلع لك نكهه غير.

نرجع للاجهزه ليش الاسعار تفرق؟ لان السعه حقت الماي او الكبسولات او الحليب تفرق واذا اوتوماتيك او يدويه ، بالاول والاخير شوفي شنو يناسب ذوقك ويناسب ميزانيتك ، على فكره علبه تسخين الحليب تنباع منفصله.

بالنسبه للاسعار ترا غيروها مره يرفعونها ومره ينزلونها :\ لان لما شريت مكينتي قبل ٦ شهور تقريبا كانت الاسعار غير "هذي الصور من موقعهم" وانصحكم تنتظرون العروضات اذكر شهر ١١ او ١٢ ميلادي ونص السنه يسوون.

انصحكم تدخلون موقعم تقرون عن كل مكينه بشكل منفصل

هنا

الكوفي بار :

مكينه القهوه مخصصه لها مكان بجلستي اليوميه عشان احسس نفسي اني بمقهى غصب p:

حاطه الاشياء الي استخدمها وابيها تكون قريبه جنب المكينه

تشوكليت باودر عشان النكهه + مق + سكر وملاعق

مكان حفظ الكبسولات ومثل مو واضح ضروري اشتري مؤونه جديده :(

مكينتي للقهوه

اخترت يو ميلك لاني احب الاتيه فراح استخدم سخان الحليب اكيد ، ملحق الماي والحليب عملي اشيله وانظفه ، القاعده الي فيها خزان الحليب والماي تتحرك يمين ويسار فاقدر احطها باي مكان بتناسب ، الحليب عندي يدوي يعني اسخنه واحطه بالكوب عشان كذا سعرها ارخص "ان شاء الله ماصير كسوله وادفع فلوس اكثر يعني p: " غير هذا حجمها حلو وسعرها ناسب ميزانيتي.

قاعده للاكواب ترفعها وتنزل فيها الماي واقدر اشيله لو الكوب حقي كبير

الكبسولات المستخدمه تنزل هنا

وتحته الماي المستخدم وضروري تشيلونه وتنظفونه دايم

اول ماتشترين الجهاز راح يجي معاه تعليمات للاستخدام اول مره ويجي الضمان حقه مهم لاترمونه ، اول مره للاستخدام لازم تنظفونها من داخل ، تاخذون علبه الماي

الي ورا وتغسلونها وتعبونها ماي ولازم ماي صحه نظيف

تضغطون على اي زر من الي هذي الازرار عشان يطلع الماي ، كررو العمليه ٣ مرات عشان تتأكدون من نظافتها ولاتنسون تحطون شي تحت لان كميه الماي الي بتنزل كبيره ، وبس خلاص راح تكونون مستعدين لاحلى قهوه.

شلون اسوي قهوتي ؟

صراحه اول ماشريت المكينه صبت باحبااااط قلت ليش كل الضجه عليها والقهوه الله يديم النعمه :"( بس كل مره اضبطها اكثر وعرفت شنو الي يناسبني ، المكينه اول ماتشترينها يجي معاها كبسولات متنوعه عشان تجربونها بس انا اخذتها من محل "الصندوق الاسود" ماعندهم هذا النظام عطانا علبتين او ٣ ناسيه بس مو انواع متنوعه ، بس لو تاخذونها من المحل نفسه لا بيعطونكم انواع وتجربون الي يناسبكم.

الثلاث ازرار الي فوق معناته كميه القهوه مع الماي الي تطلع ، اكبر دائره معناته القهوه كميتها كبيره وخفيفه ووسط واقل  شي القهوه مركزه وانتو تضيفون الحليب ع حسب المود.

بخزان الحليب في خطين ماكس وخط ثاني اقل منه ، الماكس ماتحطين فوقه شي عشان الحليب مايطلع لبرا ، يجي مع الخزان خافق يتركب وينشال اذا تبون رغوه اكثر ، بس ضيعته هههههه ، على كلام الي باع لي المكينه ، الخافق ماتحطونه اذا حطيتو الحليب لاعلى خط عشان مايطلع لبرا بس الاتيه الي اعرفه لازم في رغوه :\ بس ماجربت صراحه ، بس بكل الحالتين الخزان يسوي رغوه لابأس فيها.

خلاصنا كلام نبدآ بالتطبيق :

سويت فيديو للي يحب يطالع مايقرا p: مدلعتكم اليوم

الخطوات :

اول شي اسويه اسخن الحليب لاعلى خط "الماكس"

استخدم حليب المراعي طازج حتى شوفو جديد ههههه 

زوجي يحب نادك  ، وطويل الاجل بعد لابأس فيه بس عندي الطازج الذ يعني يرجع لذائقتكم

اضغط الزر يسخنه ، تقدرون تضغطونه مرتين ويصير لون الزر ازرق معناته تبريد بس ماحتاج حليب بارد شكرا :\

على مايسخن الحليب اخلي المكينه تنزل ماي بدون كبسوله مرتين عشان الماي يصير حار

احط السكر بالكوب واحب البني والابيض مع بعض احس له لذه ومايكون حالي مره

خلص الحليب نحطه بالكوب ونبقي شووي من الرغوه 

ناخذ الكبسوله الي نبيها ، اخترت لون البنفسجي اربيجو 

 احطها بمكانها 

اول ماتسكرين الغالق على طول بينزل القهوه عشان كذا اختارو الحجم الي تبونه قبل لاتسكرون الغالق

يمي يمي يمي الحين تشمون ريحه القهوه بالبيت كلهاااا احلى لحظه ههههه

احط باقي الرغوه وازينها بالسينمون

بس شوووي من فوق يعطي نكهه لذييذذذه ، وكوفي ميت عندهم نكهات كثيييره تمنيت اصور الي عندي

فيه بالكراميل والتشوكليت والاوريجنال تكون مثل الباودر تحطونها مع القهوه تعطي طعم عجيب ومرات احط تشوكليت باودر

يعني القهوه مزااااج شنو مزاجك اليوم سويه ، 

وبس هذي النتيجه ٬.

،

الكبسولات الي جربتهم كثااار بس هذول بعض الي حبيتهم وحبيت الذهبيه والزيتيه بعد 

هذي صوره تساعدكم شلون تسوون النوع الي تحبونه من القهوه ، انا احب اللاتيه فثلث قهوه وثلث حليب وثلث رغوه وهكذا

الفرق بين دولسي قوستو ونسبريسو؟

نجي لاكثر سؤال انطرح بالتاريخ! شنو اخذ ؟

يرجع لك ولمزاجك ولميزانيتك واحتياجك ، جربت دولسي قوستو عند صديقاتي ولذيذه ماقول لا بس الحلو بمكينتي ان كل مره تجربين طريقه وتتحكمين بالنكهات وقهوه القهوه وكميه الحليب وكل مره تعطيك طعم جديد ، انا احب اجرب واتشوووق اذوق النتيجه وياااماا ويااماا كانت التجارب فاشله وكل مره اتقن القهوه وكل مره افاجئ نفسي بطعم جديد ، نسبيريسو بس قهوه ماتسوي اي شي ثاني والكبسولات عندهم كثيييررررره عكس دولسي قوستو الي تسوي كل شي تقريبا حتى الشاي تسويه ، وبمكينتي الحليب طازج بس القهوه الي بكبسوله عكس دولسي الحليب بكبسولات بعد فاحس النكهه مهما كانت حلوه ماتكون فريش ، ولا طرقهم كلها تتشابه وكلهم نفس الشركه ، دولسي سعرها ٨٠٠ ريال تقريبا ونسبريسو اسعارها مذكوره فوق ، باختصار اذا انتي راعيه كيييف وروقان ومزاج اخذي نسبيريو اذا لا تبين شي تحطين كبسوله وتطلع لك القهوه بدون تحكم اخذي دولسو ، وبس :)

ان شاء الله البوست فاد كل عشاق القهوه واجاب عن تساؤلاتكم :)

اشوفكم ببوستات ثانيه