كيف اغير حياتي ! #غيمه٩ ♥♥

اهلا وسهلا بصديقاتي! ♥♥

اولا اعذروني علي الصور مالها علاقه بالموضوع بس صورت الي قدامي لان حسيت فجأه ابي ادون حتى لو مو كل شي بيرفكت ..

"شلون اغير حياتي؟"

كثير يطرح هالسؤال بس مو عارف وين يبدأ ، ممكن هالتدوينه ماتساعدك بس راح تلهمك ان تبدأ!

،

لحظه تفكيرك بان ودك تغيرين حياتك للافضل هذي بدايه التغيير ، انك تكونين واعيه ان في حياه افضل بكثيير من الي تعيشينها وانك تستحقين الافضل منها كافيه تخليك تبدين ، الكل يبي يعيش الحياه "البيرفكت" والكل له صوره للحياه هذي ، سواء يكون عندك فلوس اكثر ،، يكون عندك حريه اكبر او حتى حياه اجتماعيه او شهره او او ..

،

غمضي عيونك وتخيلي حياتك الي تبينها ، شنو تشوفين؟ لانكون سطحيين ممكن السعاده تكون باشياء بسيطه وتغييرات ابسط تخليك تعيشين الحياه البيرفكت الي تحلمين فيها ..

دايم وابدا اقول مابي اعيش نفس الناس العاديين الي همهم على جوالاتهم ويجتمعون وحش بخلق الله وكل يوم نفس الي قبله ونفس الي بعده! اتوقع لو متابعتني من زمان بتذكرين هالجمله كتبتها باحد البوستات.

شغلي الشاغل كيف اخلي حياتي افضل! شلون اوصل للحياه البيرفكت هذي الي احلم فيها؟؟

اكتشفت مافي شي بيرفكت اوووو مافي شي يجي مره وحده ، حاليا جداا سعيده بحياتي الحمدلله!

صح مو كل شي مثل ماابي بس لما اشوف التغيرات الي مريت فيها وشلون تعبت على نفسي ووصلت لمرحله حلوه بدون مساعده احد اشكر ربي!

عشان تغيرين حياتك اهم شي تكونين واعيه انك مسؤوله عن حياتك واختياراتك!

يمكن الكثير يقول اهلنا مايعطونا حريتنا ،، دراستنا شاغلتنا ،، ماعندنا فلوس وووووو 

لما تحطين عذر انتي تحطين عذر لكسلك "مو الكل"

مثلا وحده قالت لي ، عندك خدامه انتي مايحق لك تتكلمين عن وقت الفراغ وتسوين رياضتك ع راحتك!

صحيح كلامها الخادمه نعمه وساعدتني كثييير بس مو كل حياتي كان في احد يساعدني ، اذكر لما جبت ديم وكنت بسوي رياضه ارضعها واحطها قدامي واسوي رياضتي وهي ترضع والاعبها لحد ماخلص وتقطع علي وقت الرياضه مليون مره لكن ماحطيتها عذر

ووحده تقولي انجازاتك بسبب دعم اهلك لك المادي!

هههههه مدري وين الناس تجيب سوالف من مخها ولا ادري شنو دخل اهلي اصلا ، بس اكتشفت ان مانقدر ننجز وننجح لان نشوف غيرنا وشنو عندهم ونطلع اعذار لفشلنا 

لو عندي نفس فلوس فلانه بنجح .. لو عندي وقت فلانه بعيش حياتي .. لو عندي زوج فلانه بسوي وبسوي

وغيره من الاعذار .. اول شي نحط ببالنا الحياه مو سفر وتسوق ومطاعم .. صح انها تخلي للحياه متعه بس اعتبرها ناتج

يعني لما اتعب على نفسي واشتغل واغير بحياتي بوصل للكماليات هذي ،،    

قبل فتره افتتاح فلوريست والي بعده ، كنت زعلاااننننه ماعندي وقت للسفر او المناسبات الاجتماعيه او او

كان وقتي شغل وديم وبيتي وبس ، وصلت لمرحله بس ابكي هههههه

اقول الحياه مو بس شغل لازم اعيش واطلع واسافر

بعدها بفتره قابلت "جويل" يالله كأن ربي راسلها لي من السما صدق!

البنت هذي ناجحه وصنعت نفسها بنفسها ووقت ماكانت تسولف عن شغلها اقول ببالي من وين لها وقت ؟؟

شلون تقدر توفق بين كل شي بحياتها!! لحد ماسألتها وقالت

لازم تتنازلين عن جوانب بحياتك .. عشان توصلين لهدفك لازم شي يطغى ع شي

تقول وقتي ثمين فمخليته لشغلي وعيالي ، الحياه الاجتماعيه ماعيشها وشبه شايلتها من حياتي

وقتي لناس احبهم ويحبوني بعيدا عن المجاملات .. 

وقتها عرفت ان احنا نختار نعطي وقتنا لمنو فعلا ، هل لناس يهمونا او مجامله ؟

ممكن الكل مايوافقني الراي ، لكن المسأله ترتيب اولويات ..

يعني لو ببالك تدخلين الرياضه بحياتك بتلقين وقت ،، بدال لاتنسدحين ع جوالك تتحلطمين اخذي نص ساعه من يومك سوي رياضه فيها ، بدال لاتنامين ١٣ ساعه باليوم خليها ١٠ ساعات ، بدال لاتطلعين كل شوي وتزورين فلانه وفلانه او تروحين المول او تروحين كوفي ، خلي هالوقت خاص بالشغل على نفسك

رتبي اولوياتك وبتقدرين تتغيرين .. اذكر وحده من متابعاتي قالت لي I hope this is not a phase يعني اتمنى كلامك عن الاكل الصحي والرياضه مو بس مرحله وتعدي ،، كلامها استوقفني حيييييل ، متخيلين ان كل كل كل كل سنه اول شي اكتبه بقائمه امنياتي اهتم باكلي وجسمي ؟ وكل سنه تعدي وهالامنيه ماتتحقق ، فقررت ان امنياتي ماربطها بوقت

ماقول اذا اكتملت اغراض الرياضه ببدا او اذا بدا الاسبوع ببدا او اذا قريت معلومات كافيه ببدا

لاني ببساطه ماراح ابدا ، سالفه اني اقرا عن الشي الي ببدا فيه او بسويه اكثر شي يضيع لي وقتي

صح اني استفيد واسوي الشي بشكل صحيح بسسس العلم بحررررر كبيييررررر كل يوم بتطلع معلومه جديده

دراسه جديده سواء بالتغذيه - بالتربيه - الرياضه - الميك اب او او

فبكذا ماراح اخلص ولا راح ابدا ، ابدي بالي متوفر عندك ، او وفري اشياء بسيطه وابدي فيها ومع الوقت تعلمي واكبري

its a process of learning

عشان تغييرين حياتك غيري الي حولك ، ماننكر تأثير الناس علينا وعلى نشاطنا ، الشخص الي مايضيف لك بحياتك

وبس مجرد عثره بسلبيته او استقعاده على اتفه الامور ببساطه غيره! خاصه الاصدقاء لهم تأثير كبييير وهم اول ناس بتشجعك او تحطمك ، خلي المحيط الي حولك محيط ايجابي مع ناس تساندك تقدرين تناقشينهم وتقولين شكثر هالتغيير مهم بالنسبه لك لكن لو مافي استجابه بعدي عنهم ، في ناس ثابتين مثل الاهل والزوج ولو كانو سلبيين ببساطه سوي نفسك ماتسمعين عندي ايمان اذا تغيرتي انتي ممكن غيرك يتغير وياك بدون ماتحسين .. اذا لا ببساطه استمري وطنشي وخليك قويه!

التغيير يبدا حبه حبه ، اي شي يجي بسرعه بيروح بسرعه ، تقدرين تبدين بخطوات صغييره وشوي شوي تكبرين والتغيير يكبر معاك .. خليك واثقه بنفسك وبقدراتك متآكده مليون بالميه ان كلنا عندنا قدرات ماكتشفناها ومتأكده في اشياء بداخلنا اعظم تنتظر الوقت الصح عشان تطلع! ثقي بنفسك عشان غيرك يثق فيك!

دايم اقول محد بيشجعك وقليل الي راح يؤمن بالي تسوينه ، اذا عندك هالشخص انتي محظوظه اذا ماعندك انتي عندك "نفسك" الشخص الي بتقضين كل حياتك معاه هي انتي ، شجعي نفسك وحبيها وخليك قويه ، الناس ماتحط حساب للضعاف الي ماعندهم اراده!!

ابدي بدري ، احس او اقدر اقول متأكده ان الحياه الصباح بسس ، ويمكن تلاحظون بالسناب ان كل كل تصويري الصبح بالليل قليل اصور ، لان اقوم بدري واخلص كل شغلي اكون مروقه وعندي وقت طووويل بس يرجع زوجي خلاص ماحاتي عندي شي لازم اخلصه او اشيل هم ممكن احد يزورني او اطلع وانا ماخلصت رياضتي بالعكس اكون فاضيه تماما بعد العصر لوقت النوم ، هالشي يخليني انجز كثييير وقومه الصباح اقدر اقول غيرت حياتي :))

حطي لك هدف وركزي عليه ، صح نقدر نسوي كذا شي مع بعض بس لما تبدين التغيير ابدي بشي واحد وركزي عليه وبعدين انتقلي للي بعده عشان ماتقصرين بحق نفسك او بيتك او اهلك كلهم لهم حق عليك!!

من الاشياء الي كانت تمعني من التغير "الخوف" ، اخاف اني مو قدها ، اخاف اني ماقدر اوصل لهدفي واكون محبطه واخاف اني ماستحق هالشي ، تعلمت اني قادره .. صرت اشوف الاشياء الي بحياتي واكتشفت ان كثيير اشياء ماتوقعت اوصلها ووصلت لها ، تعلمت "اجرب" اضيف تجارب لحياتي ، يمكن هالشي مايعجبني وماكمل فيه عاااادي الحياه تستمر ، وتعلمت ان عندي امكانيات كبيره وتعلمت حتى لو اصبت باحباط بكره يوم جديد ابدا فيه ،، واهم شي تعلمته احارب "مالي خلق" هالشي يرفع ضغطي لان المزاج عندي يتحكم بحياتي تقريبا ،، بس اقوم واغصب نفسي القومه بس صعبه ولا الباقي سهلللللل واخلصه وانا راضيه عن نفسي :))

الخوف شي بعقلك وبس ، الحياه مالها حدود احنا الي نحطها ببالنا .. بس تؤمنين ان الخوف بس ببالك وانك تقدرين تعيشين الحياه الي تبينها بتقدرين!

،

التدوينه غير مخطط لها فالافكار مو مرتبه تماما لكن اتمنى انها وصلت لقلب احد لان كتبتها من القلب بدون توقف

الحياه الي تتمنينها بتوصلين لها اذا وثقتي بنفسك وبقدراتك بعيدا عن الخوف وكلام الناس واحكامهم

اتمنى لكم حياه جميله