طريقه بخوري وتعطيري للمناسبات ، انواع المباخر والبخور والعطورات الي استخدمهم هالفتره! ♥

السلام عليكم وَ رحمه الله وَ بركاته .. ♥♥

اشتقت للتدوينات الفخمه! البوست هذا ملكي فيمكن مايعجب الكل p:

امزح ، بس انا من عشاق البخور والعود والمسك والعنبر فاذا انتي ماتتقبلين الروائح هذي انصحك بتجربه هالطريقه

يمكن تغيرين رايك : ) ♥♥

،

بوست اليوم عن طريقتي بالتعطير للمناسبات ، ماتختلف كثير عن الايام العاديه بس العطورات الي تختلف 

تكلمت قبل عن طريقتي وكانت من اكثر البوستات مشاهده

http://igorgeousta.blogspot.com/2013/06/blog-post_9.html

هذا البوست الي ماشافه ، وطريقتي لاني اشوفها كانت ممتازه فماغيرتها كثير ♥♥

اول شي البخور الي استخدمه حاليا من الجزيره للعطور ، مستغربه هالمحل ماله شهره بالسعوديه لان بالكويت طق مطاقق ههههههه هو ومحل انفاسك دخون ، يمكن يرجع للوكيل ؟ لان بمحلهم بالرياض قاليري ماعندهم الا نوعين بخور هذا الي اسمه 15 انفيرسري وواحد ثاني فيه زعفران ماحبيته ، هذا جدااا جميل بس مشكلته مسقى يعني فيه خلطه عطور مو خشب صافي فمو مع اي عطر اخلطه

ريحته فواحه جدا وقويه جدا ، احبها للمناسبات والمساء بشكل عام ماتنفع للصباح برايي 

سعره بحدود ال٣٠٠ اذا مو غلطانه ♥

البخور الثاني الي استخدمه ودايم ارجعله لانه عششق ومع كل العطورات ينخلط وثباته روعه!

بخور اطياب المرشود ، انا اخذه من الكويت لان المحل كويتي للاسف ماعرف اسمه بس الي اذكره انه بخور شخصي

ومشهور بمحلهم ، يبيلي اسآل عن اسمه المره الجايه :\

شفتو الفرق بين البخورين ؟

هذي من اجمل المباخر الي عندي لانها نقطه ههههههه ♥♥♥

احبها لان اقدر ابخر فيها شعري بسهوله بسبب حجمها ، ودايم تسآلوني عنها انا اخذتها من المباركيه بالكويت

بس اكيد بتحصلون شبيه لها بالاسواق الشعبيه ♥

هذي المبخره للملابس والدولاب بشكل عام

ماعليكم من شكلها المعاق ديم طيحتها :\ بس تؤدي الغرض ، الحلو فيها انها امنه بسبب الفتحات

فماخاف اذا حطيتها بالدولاب او بخرت ثوب زوجي او غترته لان بس الي يطلع الدخان والجمر يكون بعيد

بس بنفس الوقت لازم شوي حرص بالتبخير ..

شكلها من داخل ، احبها لان فعلا امنه ، اخذتها من اطياب المرشود قبل ٤ سنين اتوقع للان يبيعونها ♥

هذي المبخره اليدويه ، انشهرت بالفتره الاخيره

احبها بالسفر او اذا مستعجله بس ما افضلها دايما لانها تحرق البخور بسبب الشعله

احساس مجرد احساس انها تغير ريحه البخور :|

هذي شكلها وهي منفصله ، انا احط البخور بالفتحه ع طول

الغطا الي بالنص ماعرف صراحه شنو استخدامه :| قلت ان ممكن نحط البخور ويولع بالحراره

بس ماطلع شي ، فاتوقع انه مخزن للبخور ، اذا عندكم خبر اكتبولي بالكومنت p:

الحلو بالمبخره هذي ان جد تفك ازمه وخاصه بالسفر مايكون الجمر دايم متوفر

وسهله احطها بالشنطه فاذا وصلت للناس ممكن وقتها اتبخر ، جتني هديه بس شفت نفسها بالاسواق الشعبيه ♥

العطر الي استخدمه للمناسبات عطر لورد من الجزيره للعطور

العطر مكون من عود هندي وعنبر وصندل ومسك وباتشولي ، المكونات الي اعشقها!

ريحته ثقيله جدا يمكن ماتناسب الكل ، بس كنت اتعطر منه بالشتا لانه مناسب جدا ، وشكلي بخليه للاجواء الرمضانيه

سعره من ٤٠٠ الى ٥٠٠ ريال ومحلهم بالرياض قاليري الدور الارضي وببنوراما جنب الالعاب ♥

عطر في دي شاتو من عطورات نيكولاي تكلمت عنه في انستقرامي بهاشتاق #عطور_قورجس

العطر هذا مزيج من الباتشولي والعنبر ريحته مستوحاه من الجلود والخشب ، مزيج مميز صراحه

احب اخلطه مع بخور اطياب المرشود احس يتمازجون بشكل احلى

من بوتيك لادوريه بالهارفي نيكلس ♥

الحين نجي لطريقه التعطير :

اول شي مثل مو شايفين عطوراتي مالها طقم وفكره اني احط لوشن معطر او شورجل معطر ماسويتها من سنتين صراحه

فالي بقولكم هي الطريقه الي شخصيا ارتاح لها اذا ماعجبتكم غيرو الطريقه لان كل جسم تفاعله مع العطور غير ♥

،

بعد الشور والجسم رطب احط لوشن الجسم او زيت الجسم ماله ريحه قويه واخلط معاه شوي مسك سائل من المجموعه الي فوق بالصوره

المسك اكيد عارفين انه من عبدالصمد القرشي وكتبت عنهم اكثر ببوست الي حطيت الرابط فوق

اكثر شي استخدمهم مسك الختام ومسك دهن العود ، دهن العود ثقيل فاستخدمه للمناسبات اكثر

بعد ماوزع المسك المخلوط باللوشن ع جسمي ارش فوقه العطر ، العطورات الي عندي تعتبر مو تجاريه تميل للنيش يعني نسبه الكحول فيها قليله فمايضر ان شاء الله ، ارش اكثر شي ع الثنايا اليد والرجل ، بعدين احط مسك عند اماكن النبض مثل عروق اليد وورا الاذن وبين الصدر "لان المنطقه تعرق بسرعه فيفوح العطر فيها" واطراف شعري واجيب البخور واحط قطعه وحده بس ماتكون صغيره مره! ابخر الشعر والملابس وارش عطر وارجع ابخر وبعدين ارش العطر مره ثانيه 

وبس ! ♥♥♥

بالنسبه لخلط العطور يعني ترشون من كذا عطر صراحه جالسه اجربها وادرسها اكثر هالفتره

اذا حسيت اني تمكنت من الطريقه اكيد ماراح ابخل عليكم ، بس دايما اذا بتخلطون عطر فيه ورد مع عطر فيه عود

حطو اول شي الورد وخلوه يبرد شووي وبعدين بخو العود وتبخرو اكيد ،،

في كثار يقولون لي شيوم مانشم ريحه بخور وعطور ماتثبت ع اجسامنا

كل جسم يختلف عن الثاني في اجسام حاره وفي اجسام بارده فالثبات يختلف

وثاني شي البشره تتفاعل مع العطر فريحه العطر علي مو نفس ريحته ع امي مثلا!

واخر شي يمكن تعودتي ع العطر فخلاص ماتشمينه بس غيرك يشمه فمن الممكن تسآلين احد تمونين عليه اذا ريحتك فواحه او لا عشان تتطمنين ..

بالاخير ، عطور الدنيااا كلها ماتفيد ولاتطلع حلوه اذا ريحتك طالعه او مو نظيفه

بليز بنات اهتمو بنظافتكم عيب احنا بالعصر هذا وكل شي متوفر وللان في ناس ماتهتم

ادري في ناس عندهم امراض بس الطب تطور ابحثو عن حلول ، والي يستغرب اني اتكلم بالمواضيع هذي

لان جد للان اروح مناسبات كبيره واشوف بنات اما ريحتها استشوار او مو زينه او ريحتها شمس

تعرفون هالريحه ؟ الي تكون طول اليوم بالشمس هههههه مادري انا مسميتها كذا :|

الي مايحب العود وغيره مو عذر في عطورات هاديه وفي بخور هادي وفي مسك هادي اهم شي ابحثو عن الي يناسبكم

الي مايشم ريحه النظافه فعلا محروم ♥♥♥

،

الله يطيبني ويطيبكم وكل من تحبون باطياب الجنه باذن الله :)

اشوفكم ببوستات ثانيه .. ♥♥♥