اكلما اشتهيت اشتريت ؟ | نظمي احتياجاتك ودولابك ووفري فلوسك! ♥♥

السلام عليكم وَ رحمه الله وَ بركاته .. ♥♥
تكلمت عن هالموضوع كحلطمه بالسناب وماتوقعت التفاعل ماشاء الله ههههه!! تلاحظون السناب صار منبع افكاري ؟ جدا جدا تلهموني هناك واحب اسولف معاكم احس نمون ع بعض p:♥♥

كثير تجيني حالات ابي اشتري بس مو عارفه شنو ومرات يكون معاي مبلغ ويروح ع اشياء تافهه ماتنذكر! واتحسف عليها بعد فتره ، متآكده كثير يشتركون معاي بنفس الفكره ، ويطري ببالي داايماا اتخلص من كل لبسي واجيب جديد ، لان كثير مايمشي مع كثير وكثير تم استهلاكه وكثير اما راحت موضته او او ..


فدايما لما احس عندي مشكله شلون احلها ؟ لما اقعد مع نفسي قعده جاده واقول لازم القى حل ، اما اذا فكرت وفكرت بدون تطبيق فماراح احل هالمشكله ابد !

نبدا بمشكله الملابس :

١. تنظيف الدولاب بشكل دوري.
قبل التنظيف متى تعرفين ان جد تحتاجين تنظفين الدولاب ؟
- الدولاب مليان بشكل حرفي.
- ماتلقين الي تحتاجينه بسرعه.
- دايما تقولين ماعندي شي البسه.
تقريبا هذا الي ببالي ، وبشكل عام يبيلك تنظفين اقل شي كل ٦ شهور مره ، ويعتمد عليك لان مثلا انا مو النوع الي اشتري لبس دايماااا بس في غيري يشترون وخاصه الي يداومون يحتاجون لبس دايما بعكسي ، يعني يرجع لك .. هذا غير التنظيف الموسمي انك تاخذين لبس الشتا وتشيلينه وتطلعين الصيفي والعكس♥♥

شلون تعرفين هالشي لازم تتخلصين منه او لا ؟
شفت هالصوره وجدا تلخص الي ابي اقوله :

١. هل الشي هذا مقاسك ؟
٢. هل لبسته خلال ال١٢ شهر الي فاتت ؟
٣. هل من الممكن البسه قريبا ؟
٤. هل هالشي ع الموضه ؟ او يمثل ستايلي ؟
٥. اذا القطعه خربانه هل من الممكن اصلحها ؟ او تستاهل فلوس التصليح ؟
٦. اذا رايحه اتسوق الحين هل فعلا بشتري شي يشابهه هالقطعه ؟
٧. هل احس بالثقه لما البس هالقطعه ؟

وجاوبو على هالاسئله بشكل صادق بدون لف ولا دوران هههههه ، في كثار يقولون يمكن يمكن احتاجها بعدين! حبيبتي اذا مالبستيها الحين ماراح تلبسينها بعدين فلا تتعبين نفسك p: دايما يقولون اذا فضيت الدولاب بتحس هم وانزاح وتحس تقدر تلبس ع راحتك وتحسين في سعه عندك لاشياء احسن! فلاتحرمون نفسكم من هالشعور عشان كلمه "يمكن البسه"

وانا جربت هالطريقه قبل وجدا جدا حبيت هالتجربه وودي اكررها باقرب وقت ان شاء الله ، اذا طلعتي بالدولاب افرزيه لشي ممتاز وشي ماينلبس .. غسلي الممتاز وكويه وحطيه بصندوق وتبرعي فيه او عطيه احد من اهلك او صديقاتك وخاصه لو كانت القطعه حلوه وجديده تعتبر ..

٢. نسقو نسقو نسقو ♥♥
الحين عشان نتخلص من كلمه شنو البس!
اذا طلعتي كم قطعه حلوه وللطلعات ، سوي لها تنسيقين او حطي تنسيق كامل مع بعض وعلقيه ، في فكره جدا حلوه خاصه للي يداومون عشان ماتضيعين وقتك تدورين شي ينلبس ، سوي تنسيقات من الاحد للخميس ، حطي كل شي مع بعض الاكسسوار والشنطه وكل شي وعلقي عليه تاق او علامه سبت ،، احد ،، اثنين وهكذا .. شفت هالطريقه بالانستقرام ياليت اعرف الحساب عشان اوريكم بس ناسيته :\ وقتها تمنيت اداوم عشان اسوي كذا ههههههه!

الطريقه هذي توفر وقت وجهد بشكل كبير وسويها كل ويك اند وخلاص ، في بنات يسونها كل ليله بس احس تسوينها مره بالويك اند اريح ولا ؟

٣. اهم شي الاساسيات
دايم خلو عندكم قطع اساسيه مثل بنطلون جينز مرتب او تنوره سودا انيقه او بلوزه ساده بيضا ، اي شي من الاساسيات ، بتساعدكم بالتنسيق ، بس تكملون اللبس باكسسوار فخم وشوز او شنطه ويطلع لكم شكل انيق ♥♥

٤. الاكسسوارات
الاكسسوار او الشنطه او الشوز خلو بدولابكم الوان اساسيه مثل الاسود والبني والنيود ، هالالوان تمشي مع اغلب الستايلات وماتاخذ وقت بالتنسيق ، ممكن تلبسون قطع فخمه مع شنطه كلاسيك سودا او شوز نيود ويطلع شكلكم مرتب! انا مو ضد الالوان اكيد بس الالوان الاساسيه تمشي مع اغلب القطع وتكرفونها بشكل اكبر !

خلصنا من الدولاب نجي لفقره شنو اشتري !
اول شي واهم شي اذا بتشترين شي هل تحتاجينه او بس ودك تشترين ؟ اكلما اشتيهت اشتريت ؟ تذكرون الحلقه الي بخواطر بنفس العنوان ؟ الي ماشافها انصحه يشوفها .. جدا اثرت فيني لاني اشتري اشياء مالها داعي ، ولما تجي مناسبه اتذكر ناقصني كذا وكذا وابي عبايه جديده ونسيت اشتري عدسات وقبل المناسبه اركض بالسوق اكمل الناقص هههههههه!! بالنسبه لي اشياء كثيره ماحتاجها بس انا كبلوقر لازم اشتري واجرب ولا مايصير عندي شي اتكلم عنه! بس نجي لغيري ، عندك ٥ ماسكرات جديده مانفتحت غير الي تستخدمينها هل فعلا تحتاجين جديده ؟ قبل ماتشترين شي هل جد جد تحتاجين هالشي ؟ وترا مو شرط لازم تشترين اشياء غاليه في ناس فلوسها تضيع ع ميك اب وفي ناس ع سوبر ماركت حتى لو ماتحتاج هالشي تاخذه ، التبذير وعدم صرف الفلوس بموقعها الصح ينطبق ع اشياء كثيره.

في فكره كتبتها قبل بالانستقرام وفعلا فعلا فادتني وخلتني اخلص الاشياء الي عندي ، صرت اكتب كل شي عندي ، كريمات العين حطيتهم لست وكريمات الوجه وكريمات الجسم يعني كل شي عندي كتبته ، كل ماخلص شي اشطب ع الي عندي ، شنو فادتني هالحركه ؟

غير اني عرفت الي عندي ومانسيت شي ، اذا جيت بشتري شي اعرف شنو الي عندي وماجيب مثله ، اي صارت لي اشتري كريمات وعندي منها تو مانفتح هههههههه ، واعرف اذا بشتري كريم وجه مثلا ان عندي كريمات كثيره واحاول اخلص الي عندي اول بعدين اشتري.

يمكن البعض يشوفه شي تافهه بس انا الي يعرفني مدمنه كريمات واشتري كثير وماخلص الي عندي فصرت الحين مخلصه كميه كبيره الحمدالله ففادتني هالطريقه كثييير .. وترا اذا كتبتي بورقه الاشياء ماراح تترتب بنفسها طبعا! هي بس ترتيب افكار وتعرفين كل شي عندك وكل شي يرجع لك بالاول والاخير بس في طرق تساعدك بتحقيق اهدافك لا اكثر ولا اقل.

،

لا تآجلين كل شي لاخر لحظه! ♥♥
في بعض الحلول خلتني دايما مستعده لاي مناسبه وماحوس كل مره واضغط نفسي ، دايما يكون عندي احتياط ، يعني اشوف العبايات مثلا اشوف محتاجه عبايه مناسبات او لا ؟ عندي شي مرتب او احتاج اشتري ؟ اذا محتاجه شريت حتى لو مافي مناسبه ، هالمثل ماينطبق تحت "اكلما اشتهيت اشتريت" ليش ؟ لان عارفه شنو احتاج وشنو اشتري ماروح السوق بشكل عشوائي ،، ومثال ثاني انا البس عدسات نظر وعندي الملونه مثل الرمادي مالبسها الا لمناسبات بس اذا جت مناسبه فجآه ابتلشت فصرت اشتري واحط بدرج "الاشياء الجديده الي بحتاجها" اي عندي درج مسميته كذا هههههه ، لازم يكون عندنا باك اب لاشياء نحتاجها فعلا للمناسبات .. في نقطه اعرف كثار يسونها ، اذا ناويه تغييرين ستايل مكياجك فجآه تتذكرين عندك مناسبه وودك تغيرين ستايل الميك اب ، اكبر غلط وكنت اسويه دايما ، اولا شي جديد علي ومرات يضبط ومرات مايضبط للمناسبه وثانيا اذا اشتريت شي لمناسبه معينه ينتهي الامر باني انساه بدرج لان ماستخدمته بشكل صح!

اذا بتسون شي لاتخلونه لاخر لحظه ، اذا نويتي تغيرين ستايلك لاتضغطين ع نفسك ، جربي واخذي وقتك قبل اي مناسبه عشان تضبطين اللوك الي ببالك وتعرفين شنو تسوين بالضبط ، وشي ثاني عشان مايضيع وقتك اذا رحتي السوق وعجبتك قطعه فخمه سويلها تنسيق كامل واخذيها وحطيها بالدولاب حتى لو مافي مناسبه ، الاغلب اذا مو الكل اذا طلعت لهم مناسبه فجآه ويضطرون يروحون السوق مايعجبهم شي ولا مايلقون الي ببالهم فيتآزمون ويطلعون بشكل مو عاجبهم ، وبنفس الوقت اذا شريتو قطعه حاولو تاخذون شي ينفع له اكثر من تنسيق ، جربو ابحثو صور من النت ودورو ع الهام وطبقو ع الي عندكم بالدولاب ، عشان تستفيدون من القطعه بكذا شكل ..

شفتو هالقطعه ؟ نزلت عنها بوست قبل هالبوست .. كان لها تنسيق مختلف تماماااا القطعه الي ع الصدر كنت حاطتها ورا وصارت فتحه ع الصدر ساده ولبست فوقه جاكيت فخم للشتا وطلع شكله جداااا حلو ، حاولو توسعون مخيلتكم شوي وتفرجو ع كثييير فاشون شو او سترتيت ستايل واخذو افكار. ♥♥


اكتبو لسته!
الي يعرفني يعرف شكثر اقدس شي اسمه نوتات وورقه وقلم ، عندي الكتابه والتوثيق ترتيب لحياتك وافكارك حتى لو مو يوميا تكتبين وتدونين يكفي شعور الامان الي تحسينه ان افكارك بمستودع خاص ماراح تطير ، ماودي اتعمق بالموضوع اكثر ابي اخصص له موضوع مستقل افضل ..

- حطو لسته بالاشياء الي ضروري تشترونها وماعندكم بديل لها حالي
- اشياء راح تشترونها اذا خلصتو من البديل الي عندكم
- اشياء للمستقبل بخاطركم تشترونها

بالطريقه هذي ترتبين نفسك وفلوسك تحفظينها وتعرفين وين تصرفينها ، عن نفسي اذا ببالي اشتري ماركه معينه اشتريها اذا سافرت لان بالغالب ماحصلها هنا .. فقبل اي سفره يكون عندي مبلغ مناسب واكتب لست بالاشياء الي محتاجتها وكم تكلف بشكل تقريبي واذا سافرت اشتري الي محتاجته واذا بقى شي ممكن اخذ اشياء ادلع نفسي فيها ، احس الواحد كل ماكان مرتب بحياته كل ماينعكس على نفسه وذاته ، من طبقت الافكار هذي واحس صار عندي متسع باللبس والفلوس الحمدالله ، دايم وابدا عندي مبلغ بالبنك مالمسه! عادي يمر عليه ٣ شهور وماحركه ترا موشرط اذا معاك فلوس لازم تطيرينها ابد ابد مو شرط ، ومرات تجي سفرات مفاجآه وانبسط اني ماضيعت فلوسي باشياء خربوطيه ويمديمي ادلع نفسي بالسفر ، صرت مانزنق اذا جتني مناسبه دايما عندي لبس احتياط بالدولاب وعندي عبايه احتياط لاي ايفنت كان ..

هذا بوست اليوم سواليف ونصايح عامه .. فكرت احطه بالستور هاوس لان اغلب البوست سواليف عشوائي بس كثار طلبوني احطه هنا لان ماعندهم ستور هاوس فلكم ماطلبتهم فان شاء الله تكونون استفدتو ♥♥

اذا عندك نصائح بترتيب الاحتياجات او الدولاب يسعدني مشاركتكم بالكومنتات .. اشوفكم ببوستات جديده ♥♥