جولتي في محل توب شوب وتوب مان وشنو الجديد♥!!

السلام عليكم وَ رحمه الله وَ بركاته ♥

اليوم بالسناب اخذتكم جوله بمحل توب شوب وتوب مان بعد اعاده الافتتاح ومره انبسطت بتفاعلكم وانكم حبيتو القطع الي شاركتكم فيها ، للي مو ضايفني هذا حسابي يمديكم تشوفونها قبل لاتنحذف بكره GorgeousShayom ..

توب شوب وتوب مان موجودين من زمان بغرناطه مول ، بس للاسف المحل كان صغير والتشكيلات ابدا مو حلوه ولاعمري اشتريت منهم بعكس محلاتهم برا السعوديه ، بس سكرو المحل لمده ٣ شهور ورجعو افتتحوه بروح جديده وتشكيلات اجمل تناسب اسم توب شوب وقيمته بالسوق!

الي مايعرف هالمحل هو ماركه بريطانيه بدآت سنه ١٩٦٤ ، يندرج تحت هاي ستريت فاشون ، يعني من ضمن المحلات الي تواكب الموضه وكل جديد ولكن بآسعار ارخص من الماركات العالميه ، لكن الجوده جدا رائعه مقابل الاسعار الي اعتبرها متوسطه مو غاليه او رخيصه حيل.

التشكيلات الجديده تندرج تحت ٣ موضات 

Barely there

التشكيله الاقرب لذوقي ، كل الي فيها ع الموضه والقصات تكون نظيفه مستوحاه من التسعينات

اغلب الكولكشن هذا بالذات فيستات واشياء طويله ، تنفع مره للمحجبات والي يحبون الساتر ، حبيت هذا الفيست مع قميص ابيض وبنطلون انيق جدا

الستايل هذا يسمونه بمبر جاكيت ، الجاكيت متفوخ وممسوك من تحت مثل الي يركبون الدراجات الناريه ، حبيته مع جينز او تنوره.

هذا بنطلون ميدي لونه خاكي وابدا ماخترعت هاللون ههههه دورو عن معناه بقوقل ، هاللون موضه الموسم هذا وراح تشوفونه كثييير.

بلوزه فيها تفاصيل حلوه من الدانتيل.

شكل ثاني من البمبر جاكيت و خاماتهم مو ثقيله بالعكس حلوه مره

زوووم ع الكلتش ، مادري ليش ذكرتني بكلتش ارميز! نفس القصه العريضه

فستان ناعم طوله ميدي بنفس اللون الخاكي ، فيه فتحات ع الجنب بس اتوقع باللبس يبان اذا الفتحات كبيره او لا

لان الخامه استريش وتاخذ تفاصيل الجسم.

نرجع للفيست ههههه احبهم!!! وتعطي شكل حلو بدون تكلف ♥♥

لون الموضه بتشوفونه يتكرر كثير

النوعيه هذي مع البناطيل تنلبس مع هيلز وقمصان ويصير كشخه او مع تي شيرت وشوز رياضي ويطلع كاجوال ♥

you can dress it up or dress it down

جمب سوت ينفع للمناسبات والبنات الي ماعندهم خصر .. حلو عليهم كذا لان يرسم خصر وهمي باستخدام الحزام

احب الكارديقن الي كذا ساتر وانيق بنفس الوقت ♥

عندهم مجموعه تنانير طولها معقول

Troubadours tales

 الكولكشن هذا مستوحينه من السبعينات وفتره الهيبيز ، شوفو الصور وتفهمون الفكره اكثر!

هالبلوزه حبيتها لان تصير ع اليدين والكتف طالع ، اتخيلها مع جينز فاتح وشنطه بيج!

هالشنطه ذكرتني بستايل دولتشي اند قابانامن ناحيه الطباعه الي عليها ♥

Scouts Honour

اخر كولكشن مستوحى من فريق الكشافه اذا عندكم خلفيه عنهم ، الالوان الزيتي والكحلي والجينز الفاتح وكثير عندهم مقلم   ، الستايل يميل للتوم بوي يعني مو انثوي وناعم ابدا لا من ناحيه الالوان او القصات.

القمصان هذي احبها! واحب طولها ، يسمونها شيرت دريس يعني القميص ع شكل فستان تنلبس بروحها بس اذا ماتحبين القصير مره مثلي البسي تحتها تايت او لقينز مع فلات او تخلينه مفتوح وتحته بلوزه في افكار كثيره ، وخاصه انه موضه هالموسم

اكثر شي عجبني التيشيرتات هذي قصاتها وسيعه يسمونها بوكسر تي شيرت شكلها كانها بوكس مربع ♥

،

الاكسسوارات متنوعه صح مو كثيره بس اي اي شي ع الموضه ودارج شفته عندهم والحلو القطع متنوعه وتناسب الستايلات الي ذكرتها فوق يعني يمديك تنسقين اكسسوارات مناسب للستايل الي راح تختارينه من الي عرضتهم ، وصورت بعض القطع :

تذكرونه ؟؟؟ جيل التسعينات بيعرفونه اكيد هههههههه

النيكلس الناعمه رجعت موضه من جديد وتكون كذا قطعه مع بعض

مثل الهامه

هذي رجعت موضه بعد عطوني هديه نفسها لون ثاني

جدا حلو العقد للمناسبات ، ع الطبيعه يبرق p:

اخذت هالحلق وواحد ثاني نفس الفكره ، مشابهه لفكره ديور المشهوره

نفس الصوره! جدددا حلو ، وناويه ارجع اخذ حق ديور بس مو اللولو شكل ثاني

،

اكثر شي مشهوره فيه توب شوب قسم الدينم ، يعني الجينزات وماشابهها ، كنت ادور الجيقنز المقطع لونه اسود من زمان وحصلته اخيررااا عندهم واكيد مافوت الفرصه واخذته ♥♥♥

نفس هذا بالضبط! والحلو ان خصره مرتفع

،

صور منوعه لباقي المحل + توب مان قسم الرجال

وبس! هذي رحلتنا في توب شوب وتوب مان ، تمنيت احط تنسيقات بس حسيت البوست طال كثير فيمكن ادرجه ببوست ثاني باذن الله ، محل توب شوب بغرناطه مول ورا دكتور كيف الي ع الشارع بالضبط وعندهم بدبنهامز المملكه نفس الكولكشن بس هذا اكبر طبعا ، موجود بعد بجده بحراء مول والتحليه مول. ♥

الافتتاح كان اليوم فالبضاعه موجوده ان شاءالله واختارو من البوست وروحو اشترو ع طول شفتو شلون سهلت لكم الحياه هههههه ♥، وقالولي ان اي شي ينزل ببريطانيا راح ينزل بالسعوديه بعد ١٠ ايام بالضبط يعني خبريه حلوه نكون مواكبين البضاعه الي برا ، وراح يكون في تعاون مع مشاهير مثل كايلي جينر قريب ، وخلال هالاسبوعين مع كل بنت او ولد يشترون منهم في هدايا متنوعه.

اشوفكم ببوستات ثانيه ان شاء الله. ♥♥♥