مشترياتي من موقع امازون وانطباعي عنه | Amazon haul

السلام عليكم وَ رحمه الله وَ بركاته
صارلي فتره ادمنت الشراء من النت وخاصه اخر شهرين كان فوق الحد صراحه ههههه بس خلاص بعقل السنه الجديده ان شاء الله :$ قررت كل فتره اوريكم مشترياتي من كذا موقع وانطباعي عن الموقع نفسه ، ماراح اتكلم عن طريقه الطلب اون لاين لان قوقل مكفي وموفي ، بليييز بليييز اخذو طله ع قوقل واقرو كثيييير الطريقه سهله اهم شي تكون لغتك الانقلش شووي حليوه عشان تقدرين تختارين صح اما الباقي مره سهل!




بوست اليوم عن طلبيتي من موقع امازون ، موقع امازون من اشهر المواقع اون لاين ، الحلو فيها كأنه مول كبييير فيه متاجر من كل مكان ، فيه الصاحي والمجنون ع قولتهم ههههه ، اي شي ممكن يخطر ع بالك بتحصلينه عندهم حتى الاكل!! ممكن المنتج الواحد ينباع عند كذا تاجر وممكن المنتج مقلد مو دايما مضمون فالافضل تقرين انطباعات الناس على التاجر وتقييمهم له ، بالنسبه لي ماحب اطلب منهم صراحه!! بس زوجي كان بيطلب فقلت دام بنشحن مره وحده بطلب الي ناقصني ، بس بالنسبه لي الافضل اطلب من مواقع غير لان مثل ماقلت ماحب امازون مره!

LORAC PRO Palette

اول شي طلبته باليت لوراك برو باليت ، كانت ببالي من زمان لان الالوان مطفيه ، طفشت من الالوان الميتاليك والشيمر صراحه ، بس لان شريت نيكد بيسك الي كله الوان مات وكان جدددا خادمني كحجم والوان بس ضاع للاسف "مادري ليش كل شي احبه يضيع :| " فقررت اخذ هالباليت لان المدح عليه قوي ، عباره عن ٨ الوان مطفيه و٨ الوان فيها شيمر ، حجمه حلو وضعييف ، ومعاه برايمر للشدو ، صوره من النت للالوان :

الرابط بالامازون :
هنا وسعره ١٧٥ ريال

FarmHouse Fresh Pajama Paste

ماسك للوجه من فارم هاوس ، هالشركه امريكيه منتجاتها تميل للطبيعيه بس مو تماما اهم شي مافيها سولفات ولا باربان ، اخترت هالماسك مو بس لان اسمه جميل ههههه بس حسيت انسب شي لي حاليا ، اسمه بيجاما بيست وهو عباره عن زبادي وعسل وشوفان واشياء ثانيه بعد ، صراحه انا ماحب اسوي ماسكات طبيعيه مع انها متوفره دايما بس اتكيسل فصرت ادور بدائل قريبه للطبيعي واهم شي متوفره متى مابغيت حطيت ع طول بدون خلط وغيره! هالمنتج تقييمه عالي باغلب المواقع ، بس بجرب منهم هالشي لو جد نفعني برجع اطلب اكثر منهم!

الماسك ينظف المسام ويضيقها ، يرطب البشره ويخفف الاحمرار يعني ببساطه كل الي احتاجه!
الرابط بالامازون :
هنا وسعره ٧٥ ريال -مسوين تخفيض حاليا-

Natural Republic Aloe Vera Gel

جل الصبار! ومادراك ماجل الصبار! كنت ابي شي لشعري واذكر دايما لما اروح الصالون اكثر ترتيمنت اطلبه لشعري الصبار ، فكرت اجيب شي طبيعي بس دايما الجاهز بديل افضل! هذا مو صبار طبيعي ١٠٠٪ بس اقرب شي للطبيعي لقيته من خلال بحثي ، مادري شلون بيتفاعل شعري معاه للان بس لازم اعطيه فتره كافيه من التجربه اولا بعدين احكم ، بس بشكل عام الصبار فوائده كثيييره وبالغالب على البشره وتخفيف الاحمرار والحكه وغيره ، مذكور انه افضل الجل مبيعا حول العالم وهو منتج كوري بس الاراء حوله متضاربه صراحه ، اذا احد جرب هالمنتج يسعدني لو شاركتوني برايكم ..

الرابط بالامازون :
هنا وسعره ٤٥ ريال

Aztec Secret Indian Healing Clay

اكثر شي متحمسه له من كثر ماشفته عند الاجانب والبلوقز ههههه ، طين معالج هندي و اكثر منتج عليه تقييم بالامازون وكثاار حبوه ، هو طين تخلطينه مع الماي او الخل ويصير ماسك سائل يميل للزوجه ، استخداماته كثيييره بس هدفي الاولي للوجه ، ماودي اتكلم عنه اكثر بس وعد اول شي بسوي عنه ريفيو هذا لما اجربه بشكل كاافي!

الرابط بالامازون :
هنا وسعره ٤١ ريال

Maybelline Instant Age Rewind Eraser Concealer

اخر شي الكونسيلر ، ترا ابدا مو من عوايدي اخلص شي من الميك اب!! بس هذا غيرررررر مره مره احبه مايخطط ولايسيح ولا يكتل ويغطي الهالات بنسبه حلوه ، اذا رجعت اخذت شي معناته ١٠ من ١٠ بالنسبه لي ، لان احب اغير واحب اجرب جديد بس هالكونسيلر صديقي الصدوق مقدر استغنى عنه! درجتي فيه ميديوم ودرجاته كثيييييره انصحكم تشوفون سواتش له وعلى وجه ناس كثيير قبل لاتطلبون لان اللون يختلف من شخص للثاني ، ماركه ميبيلين موجوده عندنا بس هالمنتج بالذات ماقد شفته الا عند تاجرات!

الرابط بالامازون:
هنا وسعره ٢٦ ريال

نجي للخلاصه :
مثل ماقلت المميز بالموقع انه جامع اشياء كثييييرررره ، تقدرين تشترين من امازون نفسه ومن تجار موثوقين متعاملين مع امازون بس الي يختلف اسعار الشحن وممكن الشحنه تجي متأخر ، مثل ماقلت في تجار غير موثوقين وهم تجار صغار يبيعون بامازون مستقلين ، لازم لازم تشوفين التقييم من الي اشترو منه وعدد النجوم ، بالنسبه لي اذا حابين تشترون افضل شي الاجهزه لان اسعارها فررررق عن الي عندنا اما غيره في بدائل اضمن لان ممكن تنغشون بالتاجر وممكن الي يجيك مو مثل الصوره مع ان ماقد صارت لي بس نفسيا مارتاح الا اذا وصل طلبي ، يمكن غيري يحب هالموقع بس عن نفسي اذا مضطره اشتري منه ، بالنسبه للشحن شحنت لصندوقي الامريكي لان كنت طالبه من كذا موقع فبجمع الشحنات ، وقتها شحنت مجاني لان استخدمت كوبون ووصل بسرعه الحمدالله بس اذكر قبل لما طلبت وصلت طلبيتي مجزأه!! يعني مره المرطب بروح ومره مكياج بروح بس هالمره مع بعض وصلو! مادري لو شحنتيهم دايركت بتواجهكم نفس المشكله ؟ انا ماقد جربت اشحن دايركت للسعوديه صراحه ، وصح في بعض التجار مايشحنون برا امريكا فلازم تتآكدين قبل الطلب اول ، نسيت اذكر لو بتشترون اجهزه تآكدو انها تمشي مع الكهربا الي عندك ، وامازون فيه امريكي وبريطاني وصيني فالاضمن بالنسبه لي الامريكي.

ان شاء الله البوست يكون مفيد واي استفسار اكتبوه بالكومنت عشان ارد عليه والكل يستفيد.