ابي اسكر المدونه واختفي .. افكار تراودني! + اسرار النجاح ..

السلام عليكم وَ رحمه الله وَ بركاته ♥♥،،
كثير يشوفني بالفتره الاخيره قل تفاعلي ونشاطي بالمدونه خصوصا ، اختفي فتره تسألون عني وأرجع واختفي وارجع لدرجه ماعاد احد يفرق لو انا مختفيه او لا الا قله من متابعاتي المخلصات الي احبهم ..

الي متباعني من بدايه المدونه قبل سنتين وشهرين يعرف اني فاتحه المدونه لسبب معين ، سبب ابي احس الانجاز بحياتي وسبب اني اطور نفسي وسبب اني احب اساعد الناس ، كانت تجيني تعليقات وتحبيطات شي طبيعي جدا جدا ، كنت أتأثر بالبدايه بس مع الوقت اقول لنفسي لكل شخص ناجح اعداء او محطمين وليش ماأخذ هذي الطاقه واحولها لشي ايجابي لي وتعطيني دافع وهذا الي خلاني استمر الحمدالله. ♥♥



كانت تراودني فكره اخلي التدوين لسبب اني ماحس اعطي شي ، اقدر اقول جلست فتره مكانك سر! كنت اقول ببالي التدوين هبه وخلاص بيطفشون الناس ، وصح صار الي كنت متوقعته قليييل من المدونين استمرو بنفس الرتم الي هم عليه ، اصعب مدونين هم السعوديات وخاصه من اسر محافظه! الناس تطفش من الكلام تبي تسمع او تشوف ، او ممكن يقولون نفقد مصداقيتنا بشخص مانشوف الميك اب عليه او مانقدر نشوف بشرته وهكذا ومالومهم ابدا لان مرات افكر نفس التفكير العين لازم تشوف عشان تثق وحتى بعض المعلومات صعب شرحها بدون تطبيق عملي ، اصعب شي تكسب ثقه اشخاص ماشافوك بالحياه او يعرفونك ويعرفون ملامحك ، عشان كذا كثير من البلوقرز الي يكتبون توجهو لليوتيوب لانهم يقدرون يتقدمون ويضيفون شي جديد لان ممتع انك تتواصل اكثر من القرائه الي تصيب الناس بالملل مرات ، هنا اقدر اقول كنت اجلس فتره بيني وبين نفسي وافكر انا وين ابي اوصل شنو هدفي ، شي ابدا مو غلط تكون حاط هدف وبعدها تضيع شوي بنص الطريق ، افكر شلون اطور المدونه ، افكر شلون اوفق بين بيتي والبيبي والشغل والمدونه ومشروعي الخاص!

كان يجيني احباط كبيييير ، لدرجه اقول لزوجي ترا بسكر المدونه خلاص ، قال يلا سكريها الحين قدامي واحذفي الانستقرام خفت صراحه هههههه ، كنت عارفه بقراره نفسي اني عندي شي اقدمه ماخلصت للان ولاتشبعت من التدوين! هذا الي وقفني عن تسكير المدونه ، غير اني احب اقرق طبعا p:

اتابع كثير يوتيوبرز وبلوقرز وجلست اشوف بداياتهم ، اسيا الكويتيه جدا جدا قديمه ماذكر صراحه متى بدت بس الي اعرفه انها بدت من موقع ال LOOKBOOK وتنزل تنسيقات لها وانشهرت لما فتحت الانستقرام ، حبيت اصرارها بالرغم كثير من النقد يجيها وحبيت كيف تطورت وفتحت يوتيوب هي وزوجها واستمتعت وانا اشوفها تكبر وتتزوج وتجيب بيبي كيوت وكيف تعاقدت مع شركات كبيره وصار التدوين حياتها وشغلها ، نفس الشي مع دلال الدوب اتابعها من متابعينها ١٥ الف تقريبا والحين قريب المليون!! اذكر اتابعها وتكتب يومياتها بالدوام وانها تكرهه الوظيفه الحكوميه ههههه مادري اذا للحين متوظفه بس ماتوقع بس حبيت اصرارها وصارت من اشهر البلوقرز العرب وحبيت انها مخصصه كل اثنين تدوينه هذا الشي يبين مدى التزامها وجديتها ماشاء الله ، واحب هدى بيوتي وهي ميك اب ارتيست عراقيه بس طول عمرها بامريكا وكيف رجعت لدبي واشتغلت على نفسها ، مره جلست مع شخص يعرفها معرفه شخصيه وجلس يسولف لي كيف انها بنت نفسها بنفسها!! كانت هي مديره اعمال نفسها وترد ع الايميلات وتشتغل وتكتب وتدون بشكل اسبوعي ترا الالتزام ابدا مو شي سهل ، لحد ماكونت لها مكتب خاص فيها وبشغلها وصار دوام رسمي لها وتعاقدت مع اكبر الشركات العالميه وصارت البلوقر الاولى بالعالم العربي ، الي الهمني اكتب هالتدوينه كنت اتابعها مسويه سلسله تيتوريالز تعلم وتتعلم ، تعلم الناس اساسيات وتتعلم تتكلم عربي مع انو كثار ناس اخذوها بضحك بس انا اشوفها جدا جدا شجاعه وذكيه وقدرت تلفت الناس والفيديوهات ممتعه اصلا!

في ناس للان مو مستوعبه فكره التدوين ،، هو مو لعب وممكن يكون وظيفه لاشخاص كثيييره ودوام رسمي ومكتب ، التدوين مثل المجلات ، شفتو شلون قبل المجلات تتكلم عن اخر الموضه والميك اب ونصايح؟ نفسس الشي التدوين واحيي كل بنت قدرت تثبت نفسها ، لان صعب على شخص واحد يبني نفسه ، مو مثل مجله لها معدين وكتاب وسكرتاريه ومنسقين ومدري شو ، المدونه كللل هالشي بشخص واحد متخيلين!

الناس الناجحه مانجحت صدفه ، الي ينجح صدفه راح يختفي بسرعه الا اذا ماستفاد من نجاحه وثبت رجله بالارض!

ماعليكم من السالفه الي فوق كلها بس كانت مجرد فضفضه :| ، الموضوع الاساسي هو شلون نقدر ننجح ، ترا ماعتبر نفسي ناجحه تماما ، لان ببالي طموحات كثيييره بحققها باذن الله ، بس النجاحات الصغيره هي اصلا الاساس للنجاح الكبير بإذن الله ، الي بذكرهم هم نقاط من رؤيتي الشخصيه قد تصيب وقد تخيب وانتو اخذو الي يناسبكم واطلعو على مواضيع مشابهه.

من اسباب النجاح :

١. تحطين لك هدف واضح:
كنت دايما اقول ابي ادون وانجح وهذا حلمي وطموحي ومدري شو بس لوين ابي اوصل ؟
كثير تبدين الشي وماتدرين وين راح يوديك عادي جدا ، بس حطي ببالك هدف لو اهداف صغيره واطمحي لها حتى يكون لك نقطه تقدرين توصلين لها وتحددين هل انتي ناجحه او انتي مكانك سر ، اذا مو ببالك هدف واضح وتقدرين تكتبينه بالخط العريض او مو عارفه مستقبلك مع الشي الي قاعده تسوينه حاولي تحطين هدف صغير توصلين له مثل ماقلت ، مثلا كان طموحي اوصل لل١٠٠ الف متابع وهذا الرقم جدا جددددا كبير وخيالي بمرحله ما بحياتي بس الحمدالله قربت اوصل له وبحققه وبدور هدف ثاني!


٢. اكتبي واكتبي واكتبي:
عندي ثقه تاااااااامه بأن اي شي تكتبينه بورقه سواء هدف او خطه او نقاط هي الي راح تخليك تنجحين ، لما تكتبين قائمه للمهمات راح تنجزين اغلبها ، ليش ؟!

• تنظم افكارك ومهامك وماتنسين شي.
•  تساعدك على اداره الوقت ، حتى لو كنتي ربه منزل لو تكتبين كل يوم شنو راح تسوين بتحصلين نفسك تنجزين اشياء كثيره ماكنتي حاطه ببالك راح تنجزينها او ماتتوقعين كان عندك وقت اصلا لها!
•  لما تشطبين على شي انجزتيه بتحسين بنشوه عارمه من الفرح p: احححب هالشعور وخاصه لما يخلص اليوم واغلب المهمات منجزتها.
•  يخليك تتذكرين مهامك وماتنسين شي طبعا.

(في ناس ماتحب تكتب لان ذاكرتها قويه ، او تحب تكتب تذكير بالجوال فكل شخص يتبع الطريقه الي يرتاح لها)

٣. تحيطين نفسك بناس ايجابيه وتتابعين ناس ملهمه.
صدقيني لما تشوفين شخص قريب منك يحب النجاح ويحب التجديد تحسين بتنافس وتحسين تبين الاحسن ويصير تنافس شريف بينكم ، طبعا حتى لو كنتي ربه بيت نفس الشي دوري ربه بيت مبدعه تهتم ببيتها واسلوب حياتها وتربيه اطفالها "اجيب امثله لربات البيوت لان النجاح مو محصور بمشروع او دراسه النجاح يكون بأي مجال حابته!!"

٤. ابدئي الحين!
في مثل حاطته خلفيه جهازي بما معناه :
اذا انتظرت اللحظه المثاليه ، لما يكون كل شي مثالي عشان تبدأ ماراح تبدأ!
يعني لاتقوليا اذا صارلي هالشي ببدا ، يعني لو بتسوين ريجيم مثلا لاتنتظرين تشترين اكل صحي تماما او عده الرياضه كلها عشان تبدين لا ابدئي ومع الوقت اشتري مو غلط ابدا ..

٥. الثقه بالذات
يمكن هذي اصعب نقطه لان اغلب اذا مو الاكل لازم تمر عليه مرحله تهتز الثقه بالنفس ، حطي ببالك ترا انتي مو الوحيده ، كثير ماعندهم ثقه بنفسهم او بشي معين اما بالشكل او الشخصيه او حتى القرارات ، في ناس عندها تردد او ماتدري صح الي تسويه او غلط ، ماراح تعرفين الا اذا جربتي ، ماراح تعرفين الا اذا انتي جد حابه هالشي او هل نفسك تستحق الافضل ، هل تستحقين تكونين بأجمل شكل أو شخص ناجح له صيته هل انتي تستحقين انك تحبين نفسك وتقدرينها او لا!!

احلى احلى شعور لما تكونين متصالحه مع نفسك مع قراراتك مع اخطائك وعيوبك وتحبينها ، اذا حبيتيها راح تقدرين تغيرينها ، ودايما لما تغيرين شي غيريه لانك تبينه مو عشان ترضين فلان او فلان ، اذا تبين تنجحين بمشروع مثلا لاتنجحين عشان يكون لك قيمه بالمجتمع او الناس يمدحونك ، صح شي حلو بس خلي هدفك الرئيسي انك ترضين نفسك اولااا ..

ترا مو صعب التغيير ، تابعي قصص ناجحين ، اذا تعبتي او وقفتي او طفشتي اخذي بريك عاااادي وارجعي اقوى واقوى ، الاصرار ميزه عظييمه اغبط الي يمتلكها ، اصري على التغيير والثقه بنفسك لانك ( تستحقين الافضل ) ولانك ( عندك حياه وحده تعيشينها ) ولانك ( اذا كبرتي تبين يكون عندك شي تفتخرين فيه مهما كان صغير )

٦. كلااااام الناس
كلام الناااس لابيقدم ولابيأخر p:
صح نتأثر طبيعي جددددا ، خاصه لما شخص قريب منك ينتقدك او يقلل من شأنك او مقدرتك ، سويت استفتاء بالانستقرام عن تأثير كلام الناس علينا وكثير قالو يأثر وخاصه لما يكون قريب منا ، والبعض قالو ابدااا ، الناس تتكلم ويمكن انا او انتي تكلمنا وحكمنا ع اشخاص بيوم ما .. طبيعي ، اذا انتي ماسويتي شي حرام ماعليك من احد ، الناس تخاف من مبدأ "عيب" والمبدأ هذا متوسع يعني ماله حد ، العيب عند شخص عادي عند غيرهم :\

الجديد الناس تهابه عادي بس خليك جريئه وخليك طموحه واثبتي نفسك ، الكلام ممكن يزعل احنا بشر ونحس بس لاتخلينه يحبطك خليه دافع لك ، ناس كثار نجحو ولهم معارضين ومع الوقت النقد تحول لاعجاب ، مثل ماقلت الكلام مايقدم ولا يأخر ، ليش؟ لانه كلام ، الكلام بالهوا ، رايي الناس شي يخصهم مو مهم ، رايك بنفسك هو الاهم!♥♥♥♥

٧. الاستمراريه والاصرار
الفشل شي وارد جدا جدا ، الاحساس بالاحباط شي وارد جدا جدا ، شوفي لك شخص ناجح بمجالك ، مستححيل مايكون مر بحلظات فشل وسقوط ، مانجح بيوم وليله ، الناس الي نجحت تعبت على نفسها ، استمرت واصرت ، في مدونه كنت احبها واتابعها بدت بعدي بفتره قصيره ، يعلم الله ماتنزل بوست الا وانا قاريته من اوله لاخره اسلوبها جميل وطرحها جديد ، مشكلتها ماكان في متابعين او ناس تتفاعل معاها حست باحباط وحذفت المدونه :"( انا متأكده لو اصرت ع نفسها كانت الحين من انجح البلوقرز ..

٨. تغيير الخطه والتجديد
 اذا طبقتي اغلب الخطوات وماحسيتي بتغيير او تقدم او احساس الرضا عن الذات ، ممكن لازم تغيرين خطتك او خطواتك او تراجعين نفسك ممكن هالشي مايناسبك او مايضيف لك شي ، بس قبل لاتستلمين غيري خطتك او حاولي تجددين ودوري طرق ثانيه للنجاح ، مثلا لو نجاحك تقيسينه بعدد المتابعين لك وماحصلتي متابعين ، غيري المحتوى الي تقدمينه او طريقه التصوير او جيبي افكار جديده ، التغيير والتجديد يفيد دايما ويجدد طاقتك اصلا ويلهمك لعطاء اكثر.

٩. ابحثي عن الهام.
عادي لو نقوم الصباح ومالنا نفس نتحرك او ننجز او نشك بالحلم الي نطمح له او نقلل من قدر احلامنا ..

طبيعي نتحبط من موقف او من نفسنا ونخذلها ، بس الي مو طبيعي نتخلا عن كل شي طمحنا له عشان شعور ومجرد شعور لايودي ولا يجيب ، شعور بكره يتغير وممكن يصير اسوء وممكن يكون احسن بكثيييير .. عشان كذا ابحثي عن الهام وعن طاقه ايجابيه تعطيك دفعه للامام ، اقري قصص عن الناجحين ، تأملي رحلات كفاح الناس ، اكتبي عبارات تشجيعيه ، جددي من روتين يومك ، جددي من نفسيتك من خلال تغيرات بنفسك او بحياتك ، تكلمي مع احد تثقين فيه ممكن يشجعك ، ارجعي لهدفك الاساسي وتخيلي نشوه الفرح الي راح تحسين فيها بس تنجزين!

ارجعي للاساس وتخيلي حياتك ورضاك عن ذاتك بعد الانجاز ، كل هالمشاعر وقتيه وباذن الله بتتغير.

هذا الي ببالي حاليا ، كتبت هالبوست ب٣ ايام ، لان شعور اني ماقدم شي كان ملازمني ، حتى لما افتح المدونه وبكتب عن شي معين صاير مايجيني الهام وكلام نفس قبل ، بدت شرارتي تخف p:

طبقت كثييررر من الكلام بالتدوينه واحس بدت ترجع لي الحياه مره ثانيه ، فمثل اي تدوينه اكتبها هي اصلا موجهه لنفسي اولا واعتبر البلوق مذكراتي الشخصيه الي اشاركها مع الناس واتمنى هالتدوينه تغيركم مثل ماغيرتني لو شوي ، وان شاء الله الجاي افضل لي ولكم. ♥♥♥♥