روتين ال٤٠ يوم بعد الولاده ، وَ اساسيات الطفل بالصور وَ تجارب

،

السلام عليكم وَ رحمه الله وَ بركاته ♥♥، مثل ماوعدتكم رجعت ببوست لما بعد الولاده وروتين النفاس! الكلام يطول بس حبيت اغطي كل الاستفسارات الي تجيني.

اول شي حابه اذكر انو البعض يمكن مايتفق معاي ببعض الكلام بس لكل شخص تجربه ، وانا مو خبره مع هالاشياء يعني p:

بس احب الاتزان بكل شي! يعني لا افراط ولاتفريط ، والتجربه هذي مناسبه لي ولحالتي الصحيه يعني ممكن كلامي صح او غلط الله اعلم بس بالاخير نفعتني الحمدالله ، اول شي نظام النفاس كامل معتمد ع اعشاب طبيعيه ماخذتها من وحده ، كلمت امي تعطيني رقمها للي سألو عنها كثيير بس تقول للحين ماردت لي خبر الحرمه فمادري لو ترضى احط رقمها ولا ، لو وافقت حطيته بالانستقرام ان شاء الله فطولو بالكم علي.

انا جلست بالمستشفى يومين ونص تقريبا ، واول ماولدت ماشتهيت الاكل ابدااا لدرجه امي فوق راسي تغصبني ، اكل المستشفى مش ولا بد ، بس اغلب الوقت كنت اشرب قهوه معاها مرٌه وماحاول اكثر عشان البيبي ، واشرب حليب حار وانا ماكنت اطيق شي اسمه حليب بس اغصب نفسي وازيد السكر شوي عشان استسيغه.

بس رجعت البيت اعترف اول اسبوع ماكنت اكل ولا اهتم بأكلي لدرجه تعبت وماحس كان فيني حيل ومتوتره جدا والنفسيه مش ولابد!

بس رحت لبيت اهلي ارتحت شوي وخاصه حسيت باستقرار اكثر ، جدول الاكل كالتالي :

الصباح الساعه ٧ونص تقريبا اكل خبز ع الصاج مع تمر او اي خبز بس يكون بالبيت مو جاهز يعني ينعجن والصبح اكله فريش مع خلطه اعشاب مادري شنو هي بالضبط بس تنحط ع الاكل وطعمها مقبول ، مدري لو تعرفون هالشغلات بس مثل الخبز الممسوح او المفروك وغيره p: ومعاه سلطه خضرا وحليب بالحلبه ، اصعب قرار مر علي الحلبه ههههه كانو يغصبوني عليها لان خفت تجلس ريحتها بالجسم وماتحمممل وانا بعمري ماجربتها!!

بس جدتي الله يعافيها جابت لي حلبه فريش طازجه ومالها اي اي ريحه لدرجه شكيت انها حلبه صراحه p: اذكر مره وحده زارتني تقول شيوم اخذي حلبه زينه للعظام قلت لها اي اخذ قالت مستحيل مالها اي ريحه اول مره ادخل ع نفاس ماشم ريحه اعشاب عاد وقتها تمنيت جدتي عندي ابوس راسها ههههههه.

ارجع انام ، اقوم ع 10 ، اشرب "قشر القهوه" مع عويدي نفس الشي ماخذتها من الحرمه مع تمر معجون بخلطه للتمر بس ، اتوقع لو تبحثون بالنت اكيد بتحصلون طريقه كل شي والاعشاب متوفره بكل مكان بس يبيلك تجمعينها وتطحنينها لو ماحصلتي احد مضمون يبيعها.

اهلي يرجعون متأخر من الدوام فانطرهم ع الغدا وقبلها اشرب شوربه مع لحم او اي نوع شوربه ، واعشق الشوربات مغذيه وتدفي ، وعلى الغدا اكل مع اهلي عادي بس ماكثر ، وخاصه الرز ماكله ابد ، وماشاء الله جيرانا واهلنا وقتها ماقصرو كل مره يرسلون اطباق اشكال والوان بس كنت ماسكه نفسي ماكثر :$

ع العشاء شاي اعشاب "شاي غوري" نسميه احنا ، وطريقته سهله تغلين ماي حار وتحطين ملعقه كبيره من الاعشاب ووشوي سكر وطعمه مقبول بعد!

العشا نفس الشي مع اهلي وبالعاده شي خفيف او شوربه وسلطه.

طبعا الخلطه المطحوونه الي احطها مع الاكل احاول اخذها بكل الوجبات ملعقه صغييره ارشها ع الاكل ، مادري شنو اسمها بالضبط ، الزبده حاولو تكونون معتدلين ، اكلو فواكه وسلطات وشوربات وماااي ، استغرب الي تقول حتى الماي ممنوع!

الماي ينظف الجسم ويغذيك وهو اساس كل شي ، قشر القهوه مع عويدي او مسمار والتمر والحليب والحلبه وشاي اعشاب واعشاب مطحونه تنحط ع الاكل هي الي تحتاجونه وبس! مافي وقت معين عشان تاكلين كل شي ، اهم شي لاتجوعين نفسك وابدي بفطور دسم وعشا خفيف.

اذكر لما بحثت بالنت عن برامج نفاس شفت العجب العجااب!!

حطي وافعلي ولاتتسبحين طول ال٤٠ يوم ولا تشربين اي عصير ولا ماي والبيت يقلب دكان اعشاب لاشياء اول مره اسمع فيها ، وتبخري بمدري شنو والحرمه اذا ماطبقت هذا بتصير خربانه ، وشو خربانه ودي افهم؟

الواحد المفروض يكرم نفسه عن هالاشياء وسوسو بالناس وانا من ضمنهم لحد ماجربت ودريت ان كلامهم كله خرابيط وهواجيس ، اهم شي تغذيه سليمه والي ماعندها خدامه او ماعندها احد يطبخلها تجيب طباخه مؤقته ،امي جابت لي طباخه خصصتها لي وعارفه كل شوي شنو تسوي.

وثاني شي النظافه الشخصيه ، انا ولدت الساعه ١٠ الليل جت الساعه ٩ الصباح اخذت شور ، الي يقول يدخلك هواء والخرابيط هذي لاتصدقونه ، شور سريع تتنظفين فيه واحرصي تدفين نفسك عدل ، بالنسبه للادوات الشخصيه مثل الفوط وغيرها اول اسبوع تحتاجون فوط كبيره وبعدها شوفو وضعكم.

اغراض شخصيه تحتاجونها للنفاس:

- شورتات قطن وياليت لو تكثرون.

- شرابات تدفي.

- اندر وير لبسه وينحذف مثل حق العمره والحج انظف لك.

- غسول بيتادين "انا المستشفى صرفوه لي ممتاز"

- دش مهبلي "هو مثل الطشط او الوعاء تحطين فيه البيتادين وماي دافي وتنقعين فيه مرتين باليوم.

- كريمات للخياطه وغيرها ، خلو الدكتوره تصرف لكم افضل.

- قطن لامتصاص الحليب الزايد "مهم جدا خاصه اول الايام عشان مايوسخ الملابس" تحصلونه بمذركير.

- بجايم قطن ، انا شريت فكتوريا سيكرت وخليتها اذا زارني ناس امون عليهم بس الافضل اول الايام تلبسون شي مو غالي لان راح تضطرون تبدلون كثير!

- الفرشاه والمعجون واغراض الشور المعروفه.

كريمات الجسم ، انصح بزبده لوكسيتان الشيا -ابحثو بقوقل عن اقرب فرع لكم- ، لوشن لينو تحصلونه بالحبيب وصيدليه وايتس وكريم سيتافيل نفس الشي من الحبيب او وايتس او غيرهم ، البايو اويل بصيدليه بوتس واخر شي زبده بالمرز بكل مكان اتوقع ، مو شرط تستخدمونهم كلهم بس هذا اكثر شي حبيته من تجاربي ، واهم اهم شي الاستمرار انا بدت التشققات تروح بنسبه كبيره الحمدالله لان اشرب ماي كثير واسوي رياضه مع ترطيب مستمر.

الحين نجي لاغراض البيبي ♥♥،

اهم شي اللبس صح ، بس ماقدر احدد كم لبسه تشترين صراحه يعتمد ع وزن البيبي ولو يجونكم زوار كثير وعلى الميزانيه ولو في خدامه تغسل وراك ولا! ، بس نصيحه لاتكثرون البيبي يكبر بسرعه ، احرصو ع الملابس الداخليه واللبس الكامل الاوفرهولات \ الكابات \ اللفات \ الصداريه \ الشرابات\فوط للبيبي.

اللبس اكثر شي عجبني نيكست وماماز اند باباز ، مذركير حليو بعد ، دورو البس الي يسكر الرجل واليدين احس افضل شي شريته صراحه عشان البرد وماتجرح نفسها اذا فكيت اللفه عنها.

اغراض ثانيه غير اللبس:

- الكار سيت \ مقعد السياره

مو ضروري تشترونه ع طول انا اخذته بعد ال٤٠

من ماماز اند باباز ،  سعره ب٨٠٠ بعد الخصم ، من عمر المواليد الى ٩ شهور ع حسب صحه البيبي ، طبعا في خيارات كثيره يرجع لميزانيتكم اكيد.

مخده الرضاعه ، احس مهمه جدا ، تحطينها ع خصرك ترفعلك البيبي وتسندين يدك عليها مريحه كثيير ، اخذتها من بوتري بارن ب١٨٠ اتوقع .. ناسيه :\ بس في نفسها بمذركير ، وبعدين ممكن تستفيدين منها اذا كبر البيبي ينام عليها او يتسند عليها.

سرير البيبي من ماماز اند باباز سعره ب٥٠٠ كان عليه خصم ، والستاند ب٣٠٠ اتوقع ، بديل لسله موسى لان ماحبيت شكلها صراحه ، وهذي أأمن لأن ثقيله شوي فماراح تطيح ع طول لو في بيبي ملقوف عندكم ، وتنفع كعربانه لاول الشهور بس للان ماجربتها ، تشترون ترولي او عجلات وتركب عليها واغلب عربانات ماماز اند باباز تركب ع هذي ، تجلس لعمر ٦ شهور ع كلامهم بس اتوقع لا! بس ديم نقطه فأتوقع يكفيها ل٥ شهور بالكثير ، حلوه تاخذونها لبيت اهلك ماتاخذ مساحه كبيره.

ادوات البيبي ، هذا البوكس من مذركير حلو فيه يشيل اشياء كثيره ، من ادوات شخصيه لادويه وغيرها

من داخل ، واتوقع تلقون بدائل كثيره اكيد.

انواع الامشطه قبل لايتم الغدر بديم وتقريعها هههههههه ، مقياس حراره بس احس الالكتروني افضل من هذا الي ينحط بالاذن ، وشفاط للخشم للتنظيف.

مسحات طبيه للسره ، ومحتفظه فيهم عشان لاسمح الله مدري ليه :|

عده الشور ، واشياء شريتها لنفسي ولا استخدمتها مثل شفاط الحليب عشان الحليب الزايد.

افضل شي شريته! اكياس للحفاظات وانتو بكرامه وافضل شي ريحتها بودره يعني تغطي شوي ههههه من مذركير

مسحات للجسم من مذركير ، مخليتها لو بنظف اغراض ديم مثل شنطتها او رول التبديل ، لان اغلب الوقت اغسلها ما اعتمد ع المناديل ابد الا اذا برا البيت واضطر لان يحسس فيها.

اغراض الشور ، اخذت سيباميد احس افضل من جونسون بمراحل وامي تقول هذي ماركتي لما كنت بيبي فاخذتها وانا مغمضه p:
من اليمين زيت تنظيف كنت استخدمه اول ماجبت ديم انظفها فيه بمنديل ثقيل لان ماكنت اعرف اشيلها او اتعامل معاها وماحسسها الحمدالله ، بس الحين ماصرت استخدمه بس انقذني فتره ،  الي جمبه شامبو شعر ووراه شامبو جسم واخر شي يسار مرطب جسم احطه لها بعد الشور وامسجها فيه اذا خلتني لان اكثر شي تكرهه الشور وتبديل الملابس -ـــ-""

نجي لشنطه البيبي!
اول شي انا ماحب الشنط القطن او الي عليها رسومات وتوحي بالطفوله :$
كنت ادور شنطه عمليه تشيل اغراض كثيره ، سهله بالتنظيف ، شكلها حلو ، اقدر اشيلها لو مابي اخذ شنطه يد بدون ماتوحي انها للبيبي! فكان الاختيار لجوسي كوتور ،،

الشنطه نايلون من بره سهله التنظيف ومن داخل بعد مبطنه عشان لو انكت شي اقدر انظفه بسهوله ، جا معاه رول للتبديل او مات للتبديل وهذا اكثر شي استخدمه احطها عليه عشان ماوسخ المكان وسهل التنظيف بعد ومعاه صداريه قطن وبوكس شفاف بس مدري وين راح ماحس له داعي :|

فيه جيوب كثيره من برا ومن داخل

هذي تعليقه لاكياس الزباله اونتو بكرامه ماخذتها من مذركير بالكويت بس ماذكر شفتها هنا مادري ليه!

من داخل

ومن الاشياء الي حبيتها فيها اني اقدر اعلقها بالعربانه بسهوله لها مثل السير ع الاطراف! مثل الصوره :

عربانه ديم من ماماز اند باباز اتوقع ربحناه هههههههههه ، هي سولا٢ يعني سولا المطوره ، اخترتها لان اهم شي اقدر اشوف ديم بوجهي ، واقدر اغير وضعيه الكرسي لجلوس او اخليه نايم او مرتفع شوي او اقلبه للجه الثانيه يكون الوجه للناس ، شكلها حلو وسهله بالاستخدام ، عربانتها القديمه من مذركير فرق بينها وبين هذي كثييير ، بس ماحبيت انو الكفرات الكبيره هوا! بس قالي اقدر ابدلهم لو خربو ب٥٠ ريال بس ، سهله بالفتح والتسكير ، لونها جينز دينم عشان كذا حبيتها واخر شي لان السرير الي فوق يركب عليها :)

عيبها انها ثقيله شوي ١٠ كيلو وزنها بس عادي لان دايم بالسياره واذا سكرتها اقدر اسحبها معاي لان فيها تعليقه من قدام مثل مو موضح بالصوره ، واخر عيب تاخذ حيز بالسياره لان شوي كبيره.

وخلصنا موضوع اليوم الحمدالله التصوير كان سريع سريع وديم تبكي وقاطعتني عشرين مره :( بس مو مشكله مابي انطركم اكثر من كذا ، واذا ماغطيت شي معين اسألوني ، وتذكرو لا افراط ولاتفريط بكل شي بالمشتريات والتغذيه وكل شي ، والي سألني متى ابدا اجهز ؟ عادي متى ماعرفتي جنس البيبي ، ومو شرط تاخذون كل شي مره وحده لان حطو باعتباركم ممكن تجيكم هدايا والسوق موجود دايما وتقدرين تروحين له اي وقت.