مراجعه لسي سي كريم كلينك | الفرق بين البي بي كريم والسي سي كريم ♥

السلام عليكم وَ رحمه الله وَ بركاته ♥ ارسلت لي شركه كلينك اصدارهم الجديد من سي سي كريم ، للأمانه من زماان واصلني وجربته كثير لأن ماقدرت احدد علاقتي معاه اذا كويس ولا!


أول شي السي سي يختلف عن البي بي كريم الي انشهر بأغلب الماركات ، السي سي اختصار ل ( colour correctors) يعني مصحح للون ، فيه حمايه من الشمس + فوائد للبشره "علاجيه ع قولتهم" + لون خفيف + يغذي البشره ، تقريبا نفس البي بي كريم بس زياده عليه انو يتحكم باحمرار البشره وبخفف منها ويعطي اشراقه لها ، الاغلب يقول انو السي سي كريم عباره عن نسخه مطوره من البي بي كريم بس الي اشوفه انو السي سي كريم تغطيته اخف من البي بي كريم ، والدرجات الموجوده اكثر بكثير من البي بي كريم ، لان الهدف الرئيسي تصحيح اللون ♥

اختار البي بي كريم او السي سي كريم ؟
اذا حابه بس توحدين لون بشرتك ومظهر طبيعي انصحك بالسي سي كريم ، لو عندك مشاكل بالبشره مثل اثار حب شباب وهالات خفيفه او ندوب استخدمي البي بي كريم.

اليوم بتكلم عن السي سي كريم من شركه كلينك الي اسمه moisture surge ، يناسب اغلب البشرات اذا بشرتك مختلطه عادي حطيه ع بشره نظيفه ، اذا بشرتك جافه رطبي قبلها ، اذا بشرتك عاديه حطي باودر ع التي الزون او المناطق الدهنيه.

مزايا منتج كلينك:

حمايه الشمس ٣٠٪ ، فيه نسبه ترطيب ، مصحح للون ، خالي من العطور ، خفيف كفورملا ، خالي من الدهون ، تقدرين تحطينه تحت الفاونديشن او بدونه.

تجربتي مع كلينك:
اللون الي انرسل لي light medium متوسط فاتح ، اول ماجربته كان بيدي وزعته ع بشره نظيفه ، تكتل ع البشره وماندمج بشكل صحيح مع انو تركيبته خفيفه!

رجعت بعد فتره جربته مع فرشاه سيفورا مينرال الباودر رقم ٤٥ المعتمده للفاونديشن ، توزع بشكل بسيط حبيته بس اظن اللون غلط وصار وجهي شكله طيني :| المفروض يصحح اللون بس واضح انو الدرجه اغمق مني ، ملمسه ع البشره مو مريح مايندمج بشكل صحيح تحسين انو طبقه ع بشرتك.

بعد ماشريت فرشاه سيقما f80 جربته وحطيت برايمر قبله ، صار افضل بكثييير واندمج صح ، بس المشكله باللون للان بس مو مهم اهم شي النتيجه ، حبيته بعد فرشاه سيقما لان عبت المسام وتداخل مع البشره بشكل صح.

رجعت جربته وخلطته مع الفاونديشن حقي ، التغطيه اكييد افضل بس ماحس اضاف شي لبشرتي والطله بشكل عام يعني ماحسيت بفايدته صراحه.

الخلاصه:

حبيت المنتج للصباح او الطلعات الخفيفه ، يوحد لون البشره اذا فيها احمرار او اثار خفييفه بس مايغطي الهالات او اثار الندوب الكبيره ، اندماجه مع البشره صعب شوي يعني ماينفع اذا مستعجله لازم تحطينه بشكل صح ، اذا بشرتك فيها قشور من الجفاف يتجمع فوقها ومنظر مش ولابد صراحه لوول ، فلازم ترطبين المنطقه بشكل سليم قبله ، بصراحه يوضح انك حاطه شي ع بشرتك يعني الطله مو طبيعيه وارجع لسبب انو اللون الي عندي ماناسبني بس ممكن لو اخترتي لونك صح بيصير صديقك المفضل للدوامات ، حبيته وماحبيته بس يدي ماتنمد له اذا مستعجله عندي بدائل تعطيني نتايج افضل بكثير ومايوضح انو حاطه طبقه ع بشرتي.

هل انصح بتجربته:

عن نفسي ماراح ارجع اشتريه لان طلعاتي الصباحيه قلييييله ، ينفع للي عندهم دوام بالتأكيد بس البشرات تختلف فنصيحتي جربي اخذي عينه قبل لاتشترينه ، التجربه خير برهان ، واظن هذا اصعب ريفيو كتبته بحياتي ههههههه ، الي جربته وحبته او ماحبته تكتب تجربتها عشان الكل يستفيد.

للتواصل معي ع التويتر والانستقرام 
الايكونز ع يمين الشاشه

|

لاتنسين الاشتراك بالمدونه ليصلك كل جديد ..
كونو دائما جميلين ♥ ..