سلسه العوده للمدارس Part 2 سر التفوق هنا ♥

السلام عليكم وَ رحمه الله وَ بركاته ♥ انبسطت جدا برده فعلكم بالبوست الي فات .. اكيد الاغلب بدا دراسته وَ الاسبوع هذا ترتيب الجداول او الكلاسات وَ حوسته وتو للان مابدأنا بالجد ، هالبوست بيكون خفيف وعباره عن نصائح مكمله للي فات ، أكيد كل بنوته تطمح انها تأخذ امتياز ، يعني تخيلي كل يوم تصحين وَ تروحين المدرسه او الجامعه ع الفاضي او تغيير جو ؟ لازم يكون لك هدف !


لاتقولين اصلا انا مو شاطره او ذاكرتي مو قويه او احاول بس ماحصل نتيجه  العذر الوحيد المقنع هو انك "مالك خلق" عشان نكون صريحين ، في ناس ذكيه بس ماتبي تجتهد وفي ناس ظروفها ع قدها ومو كل شي موفر لها بس تجيب نتايج ممتازه هم ماعندهم عقول او شي زايد عنا ، عندهم ذمه وَ ضمير بالدراسه ، لو تدققون بالبنات الي يجيبون ممتاز دايما ، شنو فرقهم عنك ؟ اذكر بنت معاي بالجامعه تجي لبس كاجوال وَ تسولف وَ تضحك معنا عاادي بس يبدا الكلاس خلاص تعزل الدراسه عن كل شي حولها ، وَ تعيش بمحيط بروحها ، قلمها ماينزل من يدها ، اول ماشفتها قلت هذي ماعندها سالفه بس كانت معي بكذا كلاس وكانت دايما تاخذ A او A+ ، تطلع مع صحباتها تسولف معنا تجلس بالبريك عااادي ماكانت تسوي شي زياده الا انها تركز بالمحاضرات وتسجل كل كل شي بنوت .. كل ماذكر فتره الجامعه اقول ياريت شديت حيلي اكثر! مو عشان فرصه وظيفيه احسن لا عشان جد اطلع مستفيده من تخصصي مو ضيعت ٤ سنين مادري شنو ابي هههههههه ، بتكلم اكثر شي عن الجامعه وَ بنات الثانوي او المتوسط ياخذون الي يستفيدون منه لان اغلب الطرق متشابهه.


١. سهله!
الجامعه سهله صدقوني ، عالم جديد بس ممتع جدا ، عن نفسي صح ماكنت بالتخصص الي احبه بس استمتعت بالايام الي قضيتها هناك واتمنى ارجع لها ، الي كاره الدراسه ، طيب هي مو عاجبتك والجامعه مخيسه والدكاتره اخيس بس مصيرك مداوم مداوم فليه تزيد الوجع وجعين ؟ خلك متفائل وتذكر اي شي تقوله لعقلك يصدقه ، اذا حطيت انو صعبه وماحب ومالي خلق بتصير اوتوماتيك صعبه مهما حاولت ، اذا حطيت ببالك لا بستمتع فيها ويكفي اجر طالب العلم ، بتكون سهله♥! يعني المصير بيدك اضحك ع نفسك ومشي بس p: اذكر ماده كرهوني فيها البنات الماده صعبه والدكتور صعب ودايما يسقطون فيها البنات وووو كلام كثير ، انا تحديت نفسي وجبت فيها A+ ! ومواد ماخذتها عبط وسخيفه واخذ ع الحفه هههههه ، يعني كل شي بالعقل راح يمشي : )

٢. اسهل شي اول شي :
 اسهل طريقه لرفع المعدل اول سنه! المواد تكون بالاغلب سهله اسهل من التخصص ، ففرصتك انك ترفعين معدلك ، لاتقولين لا جامعه بهتم بكشختي واسوي نفسي الكول الي تتأخر ع الكلاس وتسحب وتروح مع صديقاتها لا لا الكولنه ماراح تنفعك :| اسهل شي بالبدايه اذا كان معدلك صح من البدايه بيكون اساس قوي تبنين عليه باقي السنين ان شاء الله ، معادله بسيطه جدا (تهتمين بدراستك + تحضرين المحاضرات وتراجعين = امتياز )

٣. صديقه الكلاس الكول
دامك اول السنه ، خليك مع البنت الي تحضر وتشوفينها دايما جالسه قدام ، الصديقات يأثرون جدا جدا جدا جدا ، الي تشجعك وتشجعيينها راح تنجحون مع بعض ، الي ماخذه الجامعه لعب ماراح تنفعك ، وصح في بنات تسوي نفسها الي مو مهتمه : "لا نسيت اسوي الواجب ، مالي خلق احضر ، يوو مادرست اليوم" ترا اغلبهم يكونون شاطرات بس من تحت لتحت ، هي اول من يحضر وهي اول من يسلم البحوث وتدرس قبل الامتحان بسنه هههههههههه ، لاتنغرون بالبنات ، لاتنطرون احد يقولكم لا مادرست او ماسويت ، يعني تواسيكم بس ماراح ينفعك ابدا! الصديقه مهمه والافضل اذا كانت لك صديقه تقول لا احب اجلس ورا مارتاح قولي لا انا احب قدام عشان اركز ، لاتخلون احد يأثر عليكم.

٤. كوني دايما بالاماااااام
ماتدرون قد ايش اول كرسي يأثر ، اذا جلستي ورا ماحسيتي بمراقبه احد وطنشتي ويمكن تنامين او تجلسين ع الجوال "ماتذكرت نفسي ابد هههههه" ترا غلط ، اغلب البنات المجتهدات يجلسون قدام ، الدكاتره يلاحظونهم اكثر ، وفي سر اذا جلستي قدام وكنتي تبين تجاوبين تتشجعين لان ماتحسين احد بيتلفت لك وتستحين ، لا قدام ماحولك احد ، وتكونين سمعتي الدكتور وش يقول وتتفاعلين افضل.

٥. ادرسي اول باول
اي صح خليتي الثانوي بس الدراسه تظل دراسه ، شي سهل تخططين مع الدكتور كم كلمه وتكتبين ملاحظاتك ، بعد الكلاس لو عندك بريك بالساعات روحي للمكتبه راجعي بس ماراح ياخذ اكثر من نص ساعه ان كنتي ابطء شي بالدنيااااا ، مراجعتك هذي اذا جيتي للفاينل بتنفعك كثييييييييييير ، تتراكم المعلومات ومافي مخ راح يستوعب كل شي بيوم! بالنسبه للكتب ، جامعتي كان يطلبون كتب اغلبهم او ٩٠٪ ماكانو يعتمدون عليها لان ينزلون ملخصات لكل ماده ، بس بالكتاب يكون مفصل بشكل اكبر فعلى حسب اسلوب الدكتور ، اذا حضرتي كل المحاضرات وسجلتي نوتاتك وبعد ماتراجعينها يوميا ، راح يكون عندك فرصه تمرين الدكتور\الدكتوره تسألين عن شي مو فاهمته ، الدكتور بيحس باهتمامك بالماده ، اذا حفظ اسمك الدكتور اغلبهم يساعدون بالامتحانات او يعرفك ويقدرك ببعض الاجوبه فلا تفوتون الفرصه :)

٦. اسلم بدري ارتاح بقيه عمري
تسليم الاسايمنت او البحث قبلها بوقت بيكون مفيد جدا جدا جدا! ماتتخيلون المواقف الي طحت فيها لان كنت مسوفه او كسوله :\ اكون مأجله كل شي لاخر يوم تسليم واذا بروح اطبع الاسايمنت يالفلاش يخرب فجأه او اكتشف انو في فقرات مو مكملتها او الكوبي سنتر تكون طابعتهم خربانه او زحمه عندهم ويفوتني التسليم ، غلطتي لاتطيحون فيها سلمو الهوم وركس قبلها بيومين اقل شي ، لاتقولين فتره طويله يمدي ، ماتدرين لو مرضتي او صار عندك مناسبه او امتحان فجأه ، دامك فاضيه خلصي كل كل شي ويكون عندك وقت تراجعين الي سويتيه وتعدلين وغيره ، سلمو الواجبات اول باول ، حتى الدكاتره راح يلاحظونك من البنات المجتهدات ونفسيا بترتاحون p:

٧. اذا رتبتي وقتك بتترتب حياتك
الوناسه لها وقت والدراسه لها وقت والعائله لها وقت لاتخلون جانب يطغى ع الثاني ، حاولو ترتبون وقتكم حطو لكم جدول مو شرط تكونون مثالين ونفس الروبوت تطبقون الجدول بس جد جد راح تتسهل حياتك والكل عارف هذا وقت الدراسه محد بيزعجك ، لاتقولين مو بالثانوي ماله داعي ارجع اراجع اذا جبتي معدل مرتفع بيكون لك مميزات اكثر عن الباقي ، بتقدرين تسجلين بالشعب بشكل اسرع وتقدرين تختارين التخصص الي تبينه وماتنجبرين ع تخصص معين! وعند التخرج بيكون لك اوليه التوظيف كمعيده او تكملين دراستك ع حساب الحكومه او تتوظفين اسرع يعني لاتستهينون بالشي هذا!


ايش احتاج عشان اجيب ممتاز ♥
 الي يداوم يد قدام ويد ورا ادرو ماعنده سالفه :| انا كنت احب اشتري اشياء تساعد ع الدراسه واتكشخ فيها ويضحكون علي يقولون ماكبرتي اقول لا ماكبرت فماعليكم من احد p:

عده النجاح هي:

ماركر او هايلايتر او اقلام تخطيط الي تبونه ، مهمه تخططون للاشياء المهمه بالكتاب لان اغلبه كلام وحشو فانتو اخذو الزبده او الاشياء الي يركز فيها الدكتور ، وحلو يكون كذا لون عشان تنتفح نفسكم للدراسه اكثر وماتتلخبط المعلومات كل فقره مهمه بلون.

بالتأكيد قلم واحب هالنوع من الاقلام عشان اكتب السؤال بلون والاجابه بلون ، واسهل من انو اخذ كذا قلم مع بعض.

ستيكي نوتس او النوت اللاصق ، مفيد مره لو عندك ملاحظه وماكفا المكان او بتكتبين شي مهم وتلزقينه باول صفحه مثلا! مثل مواعيد التسليم او الدكتوره قالت شي مهم ، يمكن هذا اكثر شي شريته من دخلت الجامعه لان اشكالها تعجبني ههههههههههه.

انديكس كاردز او نوتات للتلخيص ، حلوه لو تراجعين وتبين تلخصين اهم النقاط او تجمعين التعاريف بورقه او المعادلات بورقه ، وحلوه بعد اذا عندك برزنتيشن تقدمينه للبنات بدال لاتشيلين كتابك كله لخصي اهم النقاط الي راح تتكلمين عنها بورقه ارتب وتركزين فيها اكثر♥.

فولدرات او فايلات ، مادري لو نفس نظامنا بس الدكاتره اول سنهه يعطونا تخليص لخطه الدراسه واهم شي راح ناخذه والهدف من الماده واوقات الامتحانات من بدايه السنه لنهايتها ، مهم جدا تحفظين اوراق كل ماده عندك بملف عشان ماتضيع لاتستهينون فيه ترا مهم جدا جدا لو نظام الدراسه يعطونكم اوراق عمل او تلاخيص او اي شي ، خصصي لكل ماده ملف ، اخذيه وقت الكلاس واي ورقه حطيها ع طول داخل الملف وحافظي عليها بدال شغل الشحاده عند كل بنت لان الاغلب مو مسؤول عن اهمالك :(

كالندر او تقويم ، مو شرط يكون عندك كتاب بس لو ورقه فيها تقويم السنه بيفيدك انو كل ماسمعتي في امتحان اكتبيه ع طول باليوم الفلاني ، سمعتي انو في تسليم بحث اكتبيه ع طول ، عشان تعرفين ايش راح يجيك بعدين ، متى يمديك تدرسين او تحضرين للبحث بيسهل حياتك وكل ماخلصتي من شي شخبطي ع ام امه بتستمتعين هههههههه ، مهم مرااا مرااا♥، حتى لو انتي من النوع الي كل شي تكتبينه بالجوال دوري لك برنامج حلو وسهل ، بس انا احب اكتب كل شي بيدي احس اوضح فسوي الي يريحك.

اخر شي هو الدفتر او النوت بوك ، اخذي اشكال فرايحيه او فيها حياه تشجعلك تفتحين وتكتبين والحين متوفر اشكال كثيييره باغلب المحلات والمكتبات حتى المتاجر الالكترونيه ، فشوفو الي يناسب شخصيتكم :)

اخيرا ، لاتنسون تتوكلون ع الله وَ تستمتعون بكل ماوتيتم من قوه ، ان شاء الله عجبكم البوست وساعدكم وبالبوستات الجايه بحاول اتكلم عن اللبس والميك اب اذا قدرت :$ ، الله يوفقكم وحده وحده وتبشروني بالنتايج السنعه ♥♥♥

للتواصل معي ع التويتر والانستقرام 
الايكونز ع يمين الشاشه

|

لاتنسين الاشتراك بالمدونه ليصلك كل جديد ..
كونو دائما جميلين ♥ ..

xo Gorgeous