One Gorgeous Year ♥ سنه أولى جميله ~

السلام عليكم وَ رحمه الله وَ بركاته ♥ تتذكروني :$؟ وَ مرت سنه .. من الصبح فاتحه البلوق ابي اكتب ابي اعبر بس هالايام وواضح جدا علي انو قريحتي الكتابيه شبه انعدمت ههههه ، مو لان مليت ابدا لا بس انشغلت وبالي مشغول وظروف كانت اقوى مني! ببالي البلوق دايما وانتو بعد دايما ببالي ، مادري من وين ابدا ! من اول بوست كتبته ع خجل واستيحاء < صح الكلمه :$ ؟ ولا من الفتره الي تركت التدوين فيها وكنت مشتاقه له جدا جدا او من اول كلمات تشجيعيه جتني وردود فعل ابدا ماكنت اتوقعها! او شرايكم اتكلم وين كنت قبل البلوق والعالم هذا ؟! بتكلم بكل اريحيه عشان كذا البوست طويل واقدر اسميه شخصي جدا جدا ♥ ..


من ايام الثانوي للجامعه فتحت مليون بلوق وارجع اقفله ، بلوق للتصميم بلوق لليوميات بلوق للشعر بلوق للصور عد وخربط :| كنت ابي اسوي شي بحياتي يشغلني او اكون شغوفه فيه بس مادري وين ابدا مالي اي توجه احب كل الاشياء واكذب لو اقول خبيره فيهم كلهم .. الشي الوحيد الي كنت متأكده منه انو عندي شي اقدمه احب اساعد احب يكون لي دور بالحياه ، كنت ادري اني شخص مهم وضروري اترك بصمه لو بسيطه ، من الاشياء الي واجهتني انو اهلي كانو جدا حريصين على الدراسه ماذكر كان عندي هوايه غير الدراسه *احزن ههههه* حتى بالمدرسه ماكان في اي اهتمام الا التركيز بالدراسه ، غلط بغلط الشخص لما يخلص من دراسته ماعنده شي بالحياه!! احس هالشي ممييييت للروح ، وانا من الاشخاص الي ماحب الروتين وداايمااا اقول مستحيل مستحيل اتخيل حياتي عباره عن دوام مكتبي ممل وبيت ومجاملات رسميه :( ابي اعيش حياه شغوفه فيها انبسط واحمد ربي عليها كل دقيقه ♥♥، اظن هذا الي السبب الرئيسي الي خلاني ابدا البلوق ، مادري لوين بيوصلني ماعمري فكرت ( وبعدين ؟ ) بس كنت افكر ليش لا؟ ممكن يفتح لي ابواب لاشياء افضل كيف وليش مادري بس متأمله خير :)

ومن الاسباب الثانيه الي خلتني ابدا بالبلوق بعد ، كان عندي اهتمامات كثيره ابي اطورها وابي احد يشاركني فيها وماكنت احصل اشخاص يشاركوني اهتماماتي ، قليل من الي اعرفهم يحبون المكياج والموضه او الماركات وغيرها ، كنت ابي احد اسولف عليه ويقول : اي فاهمه عليك :| اسولف لصديقاتي شنو تبون تنجزون بحياتكم ؟ كأني اقول لهم نكته ههههههههه ، قلت حلمي اسوي بلوق يقولون ايش الفايده ؟ ماحصلت اي تشجيع بالبدايه نسيت الفكره شوي ،، تزوجت وتغيرت حياتي ١٨٠٪ بديت حياه جديده تماما مافي صديقات مافي اهل قراب مافي مجمعات او مطاعم متعوده عليها :\ شعور مو حلو ابدا .. ضياع وشعور بالفراغ وين ابدي ؟ شلون اعيش! انا انسانه تفكيري عميق شوي وهذا الشي يتعب ههههههه يعني كثير اتعمق بالاشياء فكان صعب علي اتأقلم ، كنت مرتاحه بشكل عام بس شيما نفسها وين بالحوسه هذي كلها ماكنت ادري رجعت افكر بالبلوق ، كنت خايفه صراحه اقول انا مو خبيره بشره ولا ميك اب ولا ستايلست شنو الجديد الي بضيفه ! بس كنت متأكده انو عندي شي بس مادري شنو هههههه الشي الوحيد الي حاطته بين عيوني اكون انا ♥ واتكلم ع طبيعتي ♥، البلوق مو مرجع ولا مجله ولا موقع طبي البلوق هو انا وتجاربي وانطباعاتي اصبت او اخطأت مو مهم ، الاهم اكون راضيه عن الي قدمته ، تخطيطي للبلوق كان عشوائي مافكرت شنو راح يفيدني فيه او وين بوصل او عدد المتابعين او اذا اصلا في احد راح يقرا لي! اول بوست كتبته كان عن الشعر الويفي لان تو متعلمه اسوي شي بنفسي ومبسوطه وابي اعلم الناس انجازي العظيم ههههههههه ، فتحت بلوق ماقلت لاحد مابي تحطيم :| استمريت فتره بسيطه ، انبسطت بردود الافعال ، اظن الي كان يميزني القرقققققه مرات ارجع اقرا البوستات القديمه اقول اف اف كل هالسوالف شلون متحمليني ههههههههههههه بس كانت تجيني كومنتات كثيييره انها تحب سوالفي وانهم كأنهم جالسين مع صديقه وكان هالشي يبسططني جداا♥♥♥♥ ، حلو انك تكون ع عفويتك والناس يحبونك عشان الشي هذا ..

 اول لحظه حسيت فيها بالانجاز لما سويت مقابله في جريده عكاظ (هنا المقابله للي ماشافها ♥) أقدر اقول كان انجاز عظيم بالنسبه لي لما يكون اسمي مكتوب بجريده مطبوعه ، ،من هنا قلت هذا الشي الي ابي اكمل فيه حسيت بالانجاز وانو اسوي شي مهم ومن جد عندي تأثير ،، ماكان احد من قرايبي يعرفني كنت ابي اثبت نفسي وبعدين اقول هذا بلوقي ، كانت ردود افعالهم حلوه مو مثل ماتوقعت حتى صديقاتي كانو مبسوطين فيني ، بس ماكان في احد مقدر اهميه هالشي بالنسبه لي ، يعتبرونه شي عادي انا اعتبره انجاز كبير لان راح يوديني لاماكن اكبر ،، كثير تجيني انتقادات انو التدوين مضيعه للوقت ، وصح مرات احس بالشعور هذا خاصه لما تجيني ردود سلبيه من ناس يتابعوني كنت اتعب ع الي اقدمه ومن كلمه وحده ماعجبتهم ينسفون الماضي والي سويته هههههه ، هذا العائق الوحيد الي كنت اشوفه وكان يأثر فيني كثيير بس بالبدايه ، بعدين عرفت لو انا شخص عادي جدا جدا ماكان في ناس تعبت نفسها وضيعت وقتها بالنقد السلبي ، في ناس كانت بس تبي تنتقد بدون هدف او وقت الفراغ عندها كبييير وفي ناس تحس نفسها وصيه ع غيرها وتبي تقوم الناس ع حسب تفكيرها والي متعوده عليه ، بس بالمقابل كسبت ناس ودعاوي تفرح القلب ، كسبت قلوب اقول شلون نقدر نحب اشخاص ماقدرنا نشوفهم ونحبهم بس من من كلامهم وكومنتاتهم وتعليقاتهم الجميله ♥♥♥ .. كسبت صداقات وبلوقرز جميلات ضافو لي الكثير يعني ابدا ابدا ماحس ضيعت وقتي بالتدوين ..


 البلوق علمني اشياء كثييره وغيرني كشخص ، علمني الصبر واتقبل انو في ناس غير عن تفكيري وفي ناس كثار فيهم الخير ، يمكن كنت مقصره بالبلوق كثير وكنت اتمنى انو التدوينات اكثر والاشياء الي اقدمها افضل بس بيني وبينكم ماكنت اتخيل اني بكمل سنه اصلا وتوقعت مصير هالمدونه مثل غيرها :| فترا انجاز بالنسبه لي هههههههه ، تعلمت ماثق بناس وماهضم حق نفسي ومالتفت لتعليقات المحبطه لان لكل شخص هدف مهما كان تافهه بنظرهم يكفي اذا تذكرت نشوه انجازه بتنبسط الشعور هذا يكفي♥ ! واني استحق الافضل وكل شخص بالدنياااااا يستحق فرص افضل ويستحق مستقبل الي يتمناه ، تعلمت انو الفرص ماتجي لحد بابك انت تلحقها ، في اشياء كثيره ابي اتكلم عنها بس انتظر الفرصه المناسبه ان شاء الله ، مادري شنو اضيف اكثر بس سعيده بسنه كانت جميله اصحى وَ أنام عَ كلمات تثلج الصدر ، حلو عندك شي بالحياه مرات احسه همٌ خاصه اذا تأخرت بالتدوين "كعادتي" واني مقصره كثيير اشعر بالذنب :( بس اذكر نفسي التدوين مو واجب علي هو شي استمتع فيه اذا صار واجب بيفقد المتعه والمدونه بتفقد روحها وبيكون روتين والروتين يقتل ،، فخلوني مستمتعه وتحملو غيابي ..

يمكن البعض يستغرب ليه انا اقدس التدوين لهدرجه ترا كله صور وكلمات ، بالنسبه لي : لا لا p: هو اني افتح حياتي لاشخاص ماعرفهم واشاركهم افكاري ويومياتي وخصوصياتي ،، ف يس هذا شي مهم جدا♥ ،، الاجانب متخذين التدوين وظيفه لهم وبالنسبه لهم شي مهم بالمجتمع ، ان شاء الله هالفكره بتوصل لنا بعد ، بس المكانه الي وصلت لها المدونات العربيه مفرحه :) واذا اتخذوه شي جدي وبروفشنال مع الجانب الممتع بيتنتشر الفكره وتتقبلها الناس اكثر ..

عينه بسيطه من الناس الي تخليني احب قورجس اكثر ، تركو بصمه بقلبي شكرا لكم بنت بنت!

محظوظه فيكم ♥♥♥♥♥
شكرا ل١٦الف متابع بالتويتر♥.. شكرا ل٢٣ الف متابع بالانستقرام♥ .. شكرا ل٧٦٧ الف شخص جميل اخذو من وقتهم وطلو عَ بلوقي♥ ، شكرا ل٥٠٠ عضو مشترك بمدونتي♥ ، الكلمات ماتوفي حقكم ولا الشعور الي احسه حاليا ، انتو جزء من قورجس ومن دونكم اصلا هي مو موجوده ! كتبت هالبوست بدون مارجع اقراه فان شاء الله اوصلكم جزء بسيط من الي احسه ، قلت لكم احاسيسي صايره كثيره هالفتره p:

سنه مرت جميله بكل شي فيها ، وين بكون السنه الجايه ؟ هل قورجس بتستمر او بتلقى شي بحياتها يشغلها غير التدوين ، مابي افكر بالمستقبل ، مثل مافكرت بالبدايه .. خلونا نعيش اللحظه والجاي ان شاء الله بيكون افضل ..

شكرا لكل شي♥، قورجس تحبكم ، اوك دمعت بس دموع الفرح p: