ريحتك جميله وَ ريحه نظافه ♥♥ طريقتي بتعطير جسمي وَ شعري مع عبدالصمد القرشي ♥♥

السلام عليكم وَ رحمه الله وَ بركاته ♥♥ مين منا ماتبي تكون ريحتها جميله! يمكن الكثير مايهتم بالشي هذا بس عن نفسي مرره الاحظ روائح الاخرين هههه ، استغرب لما أسلم ع أحد وأشم ريحه استشوار او ريحه عاديه والادهى والامر لما أشم ريحه مو زينه ابد :( يمكن تشوفين البنت وخاصه بالزواجات بأجمل حلتها ولبسها وَ ميك اب وكل شي وريحتها جميله بس لما تسلمين تشمين ريحه شعرر واستشوار ، أبدا شي مو حلو! عن نفسي اعشق اعشق المسك وخاصه بتعطير الشعر وَ مايقل أهميه عن تعطير اللبس والتعطير الشخصي ، اليوم بتكلم عن مجموعتي من مسك عبدالصمد القرشي وَ طريقتي بتعطير الشعر والملابس ان شاء الله.

نبدا بأخر شيين شريتهم ، من اليمين مسك العود ♥♥ اظن ربع توله ب٢٥٠ ريال .. ريحته دهن عود ع مسك ، ريحته قويه وشرقيه بحته ، الي يشمها اول مره يحسها تصك بالراس ههههههه بس جدا روعه بالمناسبات! ولاتحكمون عليه الا لما يبرد ، انا ماحب دهن العود كثير وعندي ولا استخدم احسه يذكرني بأشياء قديمه واحسها ريحه لكبار ويبيله دراعه ههههه ، بس هذا المسك خيار روعه للي تبي روائح شرقيه بس مناسبه وريحتها ماتطغى عليك ، مثل ماقلت حلو للمناسبات وَ المساء لانه قوي.

الي عَ اليسار مسك الختام ♥♥ ، أجمل مسك بالقرشي!! أحبه أحبه وهذي ثالث علبه اخلصها من عرفته :| ريحته مدري شلون اوصفها ، مسك ورد على ريحه نظافه على شرقي على فرنسي ههههههه ، جد ريحته تجنننن ماحس اني اخذت شور الا لما أحطه ، لدرجه مره صديقتي تشمه تقول هذي ريحتك قورجس هههههههه خلاص اقترن هالمسك فيني ، انام واصحى واروح واجي لازم احطه p: سعره ربع توله او نص توله ب١٥٠ ريال تقريبا بس يستاااااهل ، ومثل ماقلت حطوه ع اماكن النبض وخلوه يبرد قبل لاتحكمون! شميت الي عند اجمل ابدااا مايتقارن فيه ، جربو وشوفو الفرق.

ع اليمين مسك العروس ♥♥ ، شلون تفرقين بينهم! المسك الابيض مرره وثقيل هذا مسك العروس والي ابيض يميل للصفار بس سائل لزج هذا الختام واغمق لون أصفر عندهم هو مسك دهن العود ، ماظن عندهم انواع ثانيه من المسك ، والمسك يختلف اختلاف تام عن المخلطات ودهن العود وغيرها ، مسك العروس من اسمه للعرايس اي وحده بتتزوج تروح تاخذه وتدعيلي ، وحتى العزابيه ياخذونه يمكن يجيهم النصيب ♥p: ريحته نظاااافه وأحس ريحته أثقل من مسك الختام.

الي جنبه مسك دم الغزال من عبدالصمد القرشي ، اول شي ريحته جدا سيئه ههههههه ، بس وظيفته مو تعطير ابدا هو للاستخدام الشخصي ويسمونه مسك الطهاره ، بعد الدوره يستخدم للمنطقه الحميميه يوقف الالتهابات والافرازات وينظف المنطقه ، ربع توله تقريبا ٢٠٠ ريال .. اقرو عن فوائد دم الغزال وخاصه انو الرسول وصى فيه :

حديث عائشة إن امرأة سألت النبي صلى الله عليه وسلم عن غسلها من المحيض ، فأمرها كيف تغتسل ، قال : ( خذي فرصة من مسك فتطهري بها )، 
قالت: كيف أتطهر بها ؟
قال: (( تطهري بها ))، 
قالت : كيف؟
قال : ( سبحان الله ! تطهري بها ) فجتبذتها إلي ، فقلت تتبعي بها أثر الدم.
أخرجه البخاري  ( لقد تم مؤخرا اكتشاف أن المسك يقضي على البكتريا ويطهر الرحم من النجاسة.)

الي متزوجه تتبع مجرى الدم وتمسح من داخل ، اما الي مو متزوجه بس تمسح المنطقه من برا والثنايا بس لاتدخله داخل ابدا ، اول ماتحطينه بيلسع بس عادي مايأثر وماننسى النظافه الشخصيه ونظافه المنطقه احس يبيلها بوست بروح.

أخر نوع بتكلم عنه هو مسك مكعبات جامد ، يجي ٦ قطع له عده استخدامات ، عن نفسي أبشره واحطه بأكياس تول وأوزعه بالادراج وخاصه الاندر وير يخلي ريحتها تجنن ومو طاغيه أبدا ، من الاستخدامات الي سمعت فيها انو ينبشر وينحط مع ماي ورد ويرش فيه الجسم بس ماجربتها للأمانه ، الي عندها طرق للأستخدام ثانيه تشاركني فيها بالكومنتس تحت ، سعره مو غالي أبد حول ال١٠٠ ريال.

طريقتي بتعطير الشعر وَ الجسم بإستخدام المسك :

أول شي وشعري مبلول أحط مسك (أختار أي نوع عَ حسب المزاج) أوزعه بيدي شوي وبعدين اوزعه ع الشعر وخاصه الأطراف ♥ ، واحطه تحت اذني وبعدين عَ طول أبخر شعري بعود ، ترا ماأعرف أنواع ولا لي تجارب أمي تعطيني وأنا أخذ هههههههههه ، بس هذا من أطياب المرشود بالكويت وجداا ريحته جميله للتعطير الشخصي مو للبيت أكيد ، بعد ماأبخر، لما احط لوشن عَ جسمي اخلط معاه شوي مسك واوزعه وخاصه انو لزج فيتوزع بسرعه ، وَ مرات أحط عند اماكن النبض وَ ثنايا الجسم مثل اليدين والرجلين ، ماسمعت أبدا انو مضر للشعر او البشره والكل يستخدمه ، بالنسبه للمسك هل ينحط ع المنطقه الحساسه ؟ مرات امسح بس من برا يكفي ، لان المنطقه حساسه ويمكن تأثر فيها أي عطر ، بالنسبه للتعطير العادي أحط معاهم أي عطر ، ماأفهم بخلط العطور بصراحه بس محد إشتكى من ريحه عطوري أبدا.

بالأخير♥، كل شخص تختلف ريحه تعطيره وَ تخضع لمزاجيته وَ ذوقه ، مايهم الريحه قد ماتهم النظافه ، التعطير عَ عرق وَ ريحه شينه تقلبك قنبله نوويه فأرجوك لاتتعطرين وَ ريحتك شينه ، النظافه أهم من العطورات :( وَ لاتنسون الشعر من التعطير يمكن البعض مايحب المسك وَ الروائح هذي بس في بدائل مثل عطورات الشعر والماركات العالميه وَ أشهرها شانيل ، وَ عندك خمريات للشعر ، شريت منها بس ماحس في مثل ريحه المسك ، كل شخص يشوف الي يناسبه والاهم النظافه وَ الريحه الجميله بالتأكيد ♥♥♥.

 ملاحظه : أفرع عبدالصمد القرشي بكل مكان ماأقدر أحصرها بس الي أروحله ببنوراما ، الأسعار مو متأكده منها بس مقاربه لها ، مرات يسوون عروضات فحاولو تنتهزون الفرصه.

أشوفكم ببوست جديد ان شاء الله ♥ 

للتواصل معي ع التويتر والانستقرام 
الايكونز ع يمين الشاشه

لاتنسين الاشتراك بالمدونه ليصلك كل جديد ..
كونو دائما جميلين ♥ ..

xo Gorgeous