لحد يستغفلك ، لحد ياخذ حقك ، لك راي .. بَلغ! #بلاغ_تجاري

السلام عليكم وَ رحمه الله وَ بركاته ، اليوم جدا جدا جدا مبسوطه بمتابعاتي وبصديقاتي البلوقرز جد اثبتو لي ولانفسكم وللناس انو عندنا صوت وَ نقدر نغيير ، كتبت هالبوست بناء ع طلب كم بنت وَ ايضا اجمع الافكار وَ الكلام بمكان واحد وَ اوضح بعض النقاط ، بالبدايه شفت صوره للبلوقر نونيتا انو في منتج من بينفت شرته قبل اسبوع واليوم رفعو سعره بصراحه ماتأكدت بنفسي بس لفتني باحدي الكومنتس عن بنت تكلمت عن برنامج *بلاغ تجاري* حمليه واشتكي ع اي شي شفتيه وبيتحركون! هي جربته وجاب معها نتيجه ، الاسعار من حولنا كل مالها بازدياد شي طبيعي صح ، بس مو الطبيعي انو الازدياد بشكل موسمي وكل مره ازور محل احصل القطعه سعرها يرتفع ويرتفع والسعر الاساسي بالموقع جدا منخفض وسعره بالدول الي برا غير غيير ، فقلت ليه مانزل البرنامج وابلغ عن مخالفه صارت معاي واخلي البنات يبلغون ، كتبت بالانستقرام "أنا اشتريت من ماك بودره وجه فكس بلس قبل ٦ شهور ب١٥٤ وبعدها بشهرين رجعت شريتها رفعو سعرها ل١٦٠!! والي تبيع تقول عادي كل مره يغيرون السعر :/ واحنا ندفع واحنا نضحك لان سوقهم ماشي ، الجشع مستحيل يوصل لهدرجه!! البودره تدرون سعرها كم ؟ بسسس ١٠١ ريال!! الارواج بامريكا سعرها ب٤٠ ريال يعني ارواج ريميل عندنا صارت اغلى من ماك عندهم هههههه ، لازم نوقف هالارتفاع والضحك كل شي بدا يغلا ابتداء من اللبس والاكل والمكياج .. بكره اظن المويه والبنزين بيديلونهم بعد :/ الله يستر .. الخطوات بسسسسسيطه بس نزلو ع جوالكم برنامج اسمه *بلاغ تجاري* موجود بالايفون والاندرويد .. اكتبو المخالفه الي شفتوها بكل مصداقيه ، انا كتبت المخالفه عن ماك .. اخر شي عندكم معلومات عن المبلغ اكتبو اسمكم ورقمكم وايميلكم وارسلو التبليغ .. اذا انتي ماتبين احد يستغلك بلغي الحين ، فلوسنا مو لاقينها بالشارع عشان تدفع مبالغ خياليه لهم :/ واذا ماحسيت في تجاوب من ماك اوعد نفسي ماعاد بشتري منه وبطلب من النت اريح واسهل واوفر فلوسي .. بلغو اذا تبون يكون لكم يد بتغيير البلد للافضل وعلى قد ماندفع ناخذ ، بلغو بلغو بلغو ❤"
في بنات قالو طيب ماراح يسون شي اشتكينا من قبل! وفي بنات تقول عادي يمكن عشان الاجارات مرتفعه اكيد النت ارخص ، الي نشوفه بمحلاتنا وجشع التجار مو شي جديد ، ماركه ماك ع سبيل المثال ماركه متوسطه بس اسعارها تشطح للماركات الهاي اند مثل شانيل وديور وغيرهم ، جودتها مو نفس جوده الماركات الكبيره وبنفس الوقت انا ابي ادفع واخد قد مادفعت ، الاسعار مو قد الجوده ولا قد الخدمه اصلا! غير هذا المحلات الاجنبيه فرق السعر بينا وبينهم كبيييييير! وهم عندهم ضرائب بعد :\ روج بامريكا ١٥ دولار يعني ٥٦ ريال وعندنا ينباع ب٩١ وسمعت انو رفعوه وكل موسم بيرتفع لحد مايوصل ل١٠٢ اظن! لان كثار من البنات يحبون ماك مو معناته استغلال لهدرجه ... انا لما رحت اخر مره اشتري منهم قبل شهرين تقريبا اسأل عن سعر البودره الي كانت معي عطتني سعر وبس وصلت للكاونتر وحاسبت الا سعر ثاني ، قلت لها انو الي باعت لي توها قالت انو البودره ب١٥٦ شلون صارت ب١٦٠؟؟ ردت علي كل مره ماك يغيرون اسعارهم ، لما جيت بطلع اسمعم يقولون تو حاسبت لوحده ب١٥٦ شلون رفعو السعر! شي مو طبيعي الي يصير ، انا اتكلم عن تجربتي مع ماك ولي تجارب مع محلات كثيره وخاصه سلسله الشايع ، مع احترامي لهم استغلال استغلال .. قبل كنا نسكت ونقول اوك مافي ترجيع عادي ناخذ بطاقه امرنا لله ، بس انو يكنسلون البطاقه والترجيع مع بعض ؟؟؟؟ لو في محلات تبديل قلنا مو مشكله بس ليش نتدبس بشي مانبيه مو غصب ! يكرهون الشخص بالتسوق *بيستانسون الرجال* لا يعني مستحيل اكره السوق بس تنحرق اعصابي لا اكثر ولا اقل :$
اول مابديت ابلغ ماتوقعت التجاوب بسسسسسرعه ماشاء الله حسيت الدكتور الربيعه الي ماسك وزاره التجاره الرجل المناسب بالمكان المناسب ، الله يجزاه الف خير ، صح شي يحزن انو ننبسط انو شخص يعطينا حقنا :") بس يارب بدايه خير ويصير مثال يحتذى فيه ، وكل شي بجزاءه عند ربه ، التفاعل كان سريع جدا معاي ، والتبليغ كان اسهل ! لو كل بنت شافت شي غلط وحست باستغلال او استغفال من احد ، مطعم صالون محل ملابس محل اثاث اي اي شي تبلغ لاتسكت ، احنا لانو نسكت الطمع والجشع يزداد ، وزير التجاره عطانا فرصه انو ناخذ حقنا ، حتى لو ماخذناه كامل بس كثر الدق يفك اللحام ، احنا شعب دفيع ومحد ينكر هالشي بس مو معناته استغلال وجشع ، صار الواحد الي يبي يروح السوق يبيله ميزانيه كامله ، احنا نبي نلبس ونكشح ونشتري الي خاطرنا فيه بس بدون مانحس انو فلوسنا تطير ، مادري ايش اقول اكثر بس جد جد قررت عن نفسي اذا ماشفت تغيير ماراح اشتري من هنا ابدا ، كل شي بالنت اوفر واسهل واجمل وارررخص ، الشحن مايكلف ، التكلفه ع الوزن وكثييير مواضيع بالنت كثييييره كثثثثيره دورو وشوفو بنفسكم ترا ماتحتاجون الا فيزا وتفتحون حساب بريد وبس!!! خلو بضاعتهم لهم اذا هم راضين يستغلونا احنا راضين انهم يخسرون ، لو وقفنا وقفه جاده بيكون لنا قرار بالتغيير للافضل ، البعض بيعتبره شي تافهه ، بس المحلات تزيد بكره الاكل بيزيد والبنزين بيزيد ويمكن حتى الهواء بيخلون عليه سعر!! احنا عايشين في مجتمع فلازم نتكاتف وهذا بالاول والاخير بيفيدنا كلنا ماراح يفيد شخص واحد ، خلو كلمتكم انا ادفع احصل نتيجه الي ادفعه ، لا اكثر ولا اقل ، لازم نكون اكثر وعي ، كثار مايعرفون اسعار المنتجات الاصليه  عندكم النت استغلوه وابحثو قبل لاتشترون شي اذا حسيتو في فرق كبير وبين النت خلوه لهم واطلبو من النت وفري فلوسك لشي ثاني ، الي تقول الشحن يكلف ، يمكن يمكن يكلفك بس بالاول والاخير انتي محد لعب عليك ولا احد استغلك انتي تدفعين القيمه الحقيقه للشي وبس! نبدا بتغيير شي بسيط وبكره نبدا التغيرات الكبيره ، كثير بلوقرز تفاعلو معي ومن جد كلنا بنصير يد وحده ويكون لنا صوت ، ومالنا صوت بدون متابعاتنا ،، متحمسين ؟

١) حملو برنامج "بلاغ تجاري" بنفع للجلاكسي والايفون.
٢) اكتبي اسم المحل الي تبين تبلغين عنه.
٣) عنوان المحل بالضبط يعني المنطقه المدينه بالشارع الفلاني رقم المحل وكذا.
٤) نشاط المحل يعني يبيع ايش بالضبط؟
٥) نوع المخالفه هم محددينها اختاري المناسب.
٦) وصف تفاصيل المخالفه.
٧) لو عندك صوره ارفقيها افضل.
٨) معلومات عنك اسمك ورقم الجوال والايميل.
٩) ارسال.

لاتنسين تكتبين بهاشتاق #بلاغ_تجاري بالتويتر عشان يتحمسون البنات ويبلغون مثلك ..

وبس ، راح يتصلون عليك بعدها بدقايق ، التفاعل سريع منهم فرجاء خلو معلوماتكم دقيقه تماما ، ولو عندكم فاتوره او اي اثبات مادي فهذا شي بيساعد كثييييير للاسف الفواتير ماجمعتها فالي عندها الفاتوره ترفقها او اذا دقو وطلبو يشوفونها تحفظها عندها ، كثره الارسال راح يحسون بقيمه المشكله الي احنا فيها وراح يكون في تجاوب ، ساعدو بالي تقدرون عليه اذا ماعندك مخالفه ارسلي الرابط لاحد تعرفينه وساعدي بنشره ، كثير كثيير في تجاوب بالانستقرام والتويتر ومتأمله خير فيكم ياصديقاتي ويارب نقدر نوصل للجرايد ، انا او انتي بروحنا ماراح نسوي شي بس كلنا مع بعض راح نقدر نغيير ، لاتحسين نفسك انك ماقدمتي شي انتي تقدرين تغييرين مساعدتك لنا بتعني الكثيرلحد يستغفلك ، لحد ياخذ حقك ، لك راي .. بَلغ!!