ايش اخذ بشنطه اليد وَ شنطه السفر ، ترتيباتي وَ شويه أفكار ♥ #قورجستا

السلام عليكم ورحمه الله وبركاته ♥♥، اعتذر عن تأخير البوست من أمس اشتغل عليه بس لان الكام جديده جالسه اتعلم عليها وابدا ماتجننت عشان اضبطلي كم صوره :( المهم ! مابقى شي ع العطله وَ السفرات والوناسه ، فحبيت اسوي هالبوست عشان احفزكم تشدون حيلكم وَ تكافحون لاخر يوم دوام ♥♥p; بوست اليوم بيكون عن اهم الاشياء الي اخذها بشنطه اليد + السفر ، طبعا محتويات كل شنطه يد تختلف من بنت للثانيه ، عن نفسي احب اشيل معي كل شي وكل ماكانت الشنطه كبيره كل ماكانت افضل! كل ماذكر شنطنا القديمه وقد ايش كانت نقطه اقول كيف كنا عايشين هههههه ، الي اذكره بالنسبه لشنطي انها بدت تتضخم من اخر سنوات الثانوي لليوم هذا الي وصلت لحد كبير من التضخم هههههههه ، الي بتكلم عنها اليوم بس شنطه اليد للطلعات وَ السفر بشكل عام ♥ ، واكيد تختلف اختلاف تام عن شنط العزايم والسهرات!

شنطه الطلعات اهم شي تكون مريحه وَ اقدر البسها بيدي او ع كتفي ، حاليا شنطتي الي معي من جوسي كوتور اخذتها من فتره ماظن موجوده للان ، الي حبيتها فيها انو من برا نايلون "ترا مافهم بالخامات ابد هههههه بس يارب اني مو غلط :|" الخامه تتنظف بسرعه وعمليه كثير ومن داخل وسيعه وَ فيها جيوب ، هذا الي احبه بجوسي شنطهم عمليه وَ مسكتها مريحه كثير♥♥♥!

اول شي اخذه محفظتي\البوك ، جوالاتي .. عندي ٣ جوالات وايباد كنت اشيلهم بكل مكان بس مدري ليه التعذيب خليت كل شي بايفون واحد وريحت نفسي :$ ، عطر وَ مسك ضروري معي وين ماروح هههههه بس نسيت اصورهم :$♥♥ ، نوته وَ قلم مرات تجيني افكار لبوستات ومرات احب اشخبط بوقت ماكون فاضيه ماحب اكتب بالجوال افكار كثيره احب كل شي بيدي ، كريم يد تقريبا بكل شنطه اخلي كريم عشان مانسى احط واكيد لازم ننتبه لو كان معطر مانطلع فيه للشمس عشان مايسمر اليد ، معقم يد احب من ديتول ومن باث اند بودي وركس روائحهم حلوه ، نظاره شمسيه اذا سافرت او بطريق طويل اخذها معي ، مشط صغير هذا ضروري جدا ماخذته من بودي شوب ، ربطه شعر جربت ربطات كثيره بس مافي نفس ربطات جوسي كوتور وتنفع اساور بعد تمسك الشعر وماتخليه يهبط نسيت اصوره :| ، مرطب شفايف اعاني من جفاف شفايفي مشكلتي من الازل لازم المرطب معي دايم واحطه بشنطه الميك اب ، سماعات للجوال ، مناديل مرطبه من كلينكس هذا المنقذ الرسمي لي♥♥ هههههه مرات بمطعم اتحمس واوصخ عباتي او مرات عبايتي تغبر من تحت ودايما موسوسه انو يدي مغبره فلازم المناديل المعقمه معي داايما :( ، مناديل كيرفري الرطبه ، هذي مهمه لو اضطريت ادخل دوره مياه تنظف المنطقه وريحتها حلوه ، شنطه المكياج ، ضروري اخذ الاساسيات لان مرات اكون طالعه سوق وفجأه ابي ازور احد فلازم اتضبط وَ هي نفسها تقريبا الاشياء الي اخذها معي بالسفر.

- بودره وجه من ماك .
- كونسيلر من قارنييه .
- كوركتور من بوبي براون.
- علبه شدوات من ماك (دايم معي لان فيها الالوان الاساسيه واللون البني استخدمه برسم حواجبي).
- كحل اسود من اوربن ديكاي.
- كحل بيج من ميك اب فورايفر.
- ماسكرا بينفت.
- ايلاينر سيفورا.
- بلشر + برونزر عادي اي شي قدامي اخذه.
- روج لونه قوي + روج لونه خفيف وصباحي ويكونون مناسبين للون البلشر الي اخذهم.
- فرشاه مشطوفه لرسم الحواجب من ماك واقدر استخدمها لرسم الشدو تحت العين.
- فرشه دمج من ماك.
- فرشاه بلشر من ماك.
- مناكير وبالعاده اخذ احمر يمشي مع كل شي.
هذي الاشياء الاساسيه الي اخذها لان بالسفر مافي وقت للمكياج فحلو شي ناعم جدا ومرتب بنفس الوقت ، وبنفس الوقت لو بروح سفره ازور اهلي او ادري بيكون في عزايم بالحاله هذي اشيل معي كل المكياج هههههههههه ، فانتو حددو سفرتكم لايش بالضبط ، وعلى كذا تعرفون ايش تاخذون معاكم♥♥.

تقريبا هذا كل شي لشنطه اليد ، الحين بنشوف ايش الاشياء المهمه الي اخذها بشنطه السفر ، مثل ماقلت الاشياء الي بتاخذونها تعتمد اعتماد تاام ع وين رايحين! لو مسافرين زياره لاهلكم بتكثرون من ملابس الكشخه وَ تقللون الملابس المريحه لان اكيد بتكون في عزايم وزيارات ، لو سفره سياحيه بتعتمدون ع شي مريح وَ عملي ، لو انتي تلبسين عبايه بسفرتك انصحك نصيحه كثري من شي اسمه ليقنزاااات ♥♥♥♥ ، مريحه مريحه وخاصه انو العبايه تجيب الحر! ومع اللقنزات تيشرتات قطنيه تمتص العرق لان مثل ماقلت العبايه تجيب الحر ، لو انتي ماتلبسين عبايه فاكيد اللبس الي بتاخذينه بيعتمد ع ذوقك انتي وحسب الدوله الي بتسافرين لها ، واحرصي انو تاخذين قطع لها اكثر من تنسيق وتنلبس اكثر من مره بشكل مختلف مثل القمصان البيضا الوسيعه احس تخدم بالسفره ، واكيد اللبس المحتشم مايتعارض مع الشكل المرتب♥♥.

"يمكن احتاجه" هذي الجمله الي تخلينا نشيل كل ابو شي بالدولاب :( حاولت اقضي ع الظاهره هذه بس ماقدرت ههههههه ، فصرت قبل لاشيل لبس اشوف كم يوم بجلس ؟ مثلا اسبوع .. اخذ ٧ تنسيقات ل ٧ ايام و٣ بجايم ، واحرص انو اخذ قطعه تنلبس كذا مره عشان اوفر مكان بالشنطه ، ومرات ازيد تنسيق زياده احتياط ، وخاصه لما ازور اهلي تجي العزايم من كل حدب وصوب ، هذا بالنسبه للبس اما ترتيبي لباقي الاشياء اخذ بالعاده شنطتين او ٣ شنط صغيره.



شنطه كريمات :
هذي شنطه هيلو كيتي من اويشو اخليها للكريمات تشيل بشكل كبيييييير ، اكيد لما تسافرين ماراح تهتمين ببشرتك نفس الي متعوده عليه و مهما اخذتي كريمات صدقيني ماراح تستخدمينها ، لان اغلب الوقت تكونين طالعه وبس ترجعين تدورين السرير وتدورين النووووم :( فاحرصي اخذي الاشياء الاساسيه.
- غسول للوجه (ضروري تاخذين غسولك معك).
- تونر (احس ماقدر اسافر من دونه :( ).
- كريم للوجه.
- واقي شمس (ضروري ضروري اول شي يدخل الشنطه!!).
- مرطب للجسم (انا اخذ هذا من سيفورا بسفراتي من زماان مشتريته وابي اخلصه باي طريقه بس مدري كيف :| الحلو فيه انو يستخدم لكل الجسم حتى الوجه يعني لو تاخذينه بيكفيك عن كل الكريمات ، بس عن نفسي احب اخلي لوجهي كريم خاص بما انو حساس).
- كريم يد.
- ديودرنت.
- مزيل مكياج.
- قطن + اعواد اذن.

شنطه الشور :
شنطه الشور هي شنطه بلاستيك تحطين فيها عده الشور تدخل الحمام وماتتوسخ واذا انكت فيها السوائل ماتضر ولاتتسرب برا ، اخذتها من فكتوريا سيكرت زمان بس للان معروضه وتجي قطع اكثر ومعاهم وحده بس جيب اخذها اكثر من هذي ، اهم الاشياء الي اخذها :
شامبو شعر
بلسم او كونديشنر
شورجل
فرشاه اسنان
معجون اسنان
ليفه جسم
ولو لي مزاج اخذت مقشر بعد

بالنسبه للشامبوات ، عندي عينات من الماركات الي استخدمها مثل المكديما وسوب اند قلوري فاخذهم بالسفريات لان صعب اشيل كل شي معي! العينات او يسمونها احجام السفر تحصلونها باغلب المحلات وحتى باث اند بودي وركس يبيعون شورجلز نقط احجامهم وكيوت :$ واذا ماعندكم اخذو علب فاضيه وعبوها بالي محتاجينه وتنباع العلب بسيفورا ودايسو وشفتها ببوتس ووايتس اذا مو غلطانه .. بالشكل هذا بيكون الكميه اقل والوزن اخف وخاصه لو بتسافرون بطياره بتحتاجون كل جرام من الوزن!

شنطه الاكسسوار :
اخذ شنطه صغيره احط فيها اكسسواراتي وساعاتي الي بلبسهم واراعي اكيد انهم ماشين مع اللبس الي مختارته ، بالسفرات السياحيه ماهتم بالاكسسوار كثير صراحه فاخذ اغلب شي اساور ناعمه وساعتين وخواتم، واحطهم بالعاده بالشنطه السودا الصغيره من قيس "الي مصورتها مع اغراض شنطتي فوق" واحطها بشنطه اليد ♥♥

غير هذا اخذ معي استشوار ماراح يكون في وقت اسوي شعري بس اهم شي انشفه مع انو الفنادق فيها blow dryer بس ماحس يسوي شي! واخذ الشوزات اكيد ، مع عطر زياده وشنطه زياده غير الي ماخذتها بالطريق.

ترتيب الشنطه !
اتحمسسس ارتب الشنطه اذا بسافر بس اطفشش ارجع افرغها اذا رجعت ههههههههه ، اذا مسافره لسياحه وعارفه بتسوق احط شنطتين داخل بعض ، الشنطه الاساسيه وشنطه اصغر منها ، عشان اذا تسوقت يكون في مجال ومابتلش واروح اشتري شنط بعد :|

اول شي اذا الملابس كثيره ارتبها بالشنطه ع شكل رول الفهم كلهم بشكل رولات واصفهم جنب بعض ماتاخذ حيز ولا مكان ، واذا مو كثيره عادي احطهم باي طريقه ، اذا ماخذا اشياء مابيها تتعفس ممكن اخليها اخر شي افردها فوق الملابس او اخذها بكيس ملابس الخاصه بالتعليق -نسيت اسمها :| - واذا معاي عطورات احطهها بين الملابس عشان ماتتكسر ، شنطتي لها جهه للملابس وجهه فيها مثل الشبك احط فيها اغراضي الباقيه كلها ، مرات اخذ معي فواحه ومعطر جو لان اكره الروائح الي موب زينه :| واذا ماخذه شوزات جلد اخذ منظف الشوزات معي بعد! ومانسى اخذ مخده وشرشف خفيف معي لان مرات لما نحجز فندق بالصور واو وخمس نجوم وننصدم اذا رحنا فلازم اخذ احتياطاتي ، وماننسى الكام اهم شي يدخل بالشنطه ، ولو مسافرين بطياره رحله طويل اخذو معكم سناك وكتاب تتسلون فيه او حملو فيلم ع الايباد ، تقريبا هذا كل شي اخذه معي مدري كل الناس تشيل كل شي معاها ولا ههههههههه ، وهذي صوره نزلتها بالانستقرام من فتره طويله فيها ترتيبي للشنطه :

ان شاء الله اكون افدت احد لو بشكل بسيط ، لكل بنوته عندها امتحانات اتمنى لها النجاح والتوفيق وشدو حيلكم مابقى شي ع العطله اذا ربي احيانا باذن الله وبتنبسطون فيها سواء سافرتو ولا ، ومافي احلى من النوم بالعطل ولا ؟ p;♥♥

للتواصل معي ع التويتر والاسك والانستقرام الايكونز ع يمين الشاشه

  

لاتنسين الاشتراك بالمدونه ليصلك كل جديد ..

كونو دائما جميلين ♥ ..