اول خطواتك لتصيري ستايلش ! اساسيات + معلومات + نصائح #ميني_منيكان

السلام عليكم وَ رحمه الله وَ بركاته ♥، كيفكم مع الدراسه وَ الاجواء الهاديه احس من قبل العطله للحين والناس بحاله خموول p: يارب بوستاتي تصحصحكم وَ تكونون مستمتعين فيها ، قبل فتره حضرت ورك شوب للجميله استاذه نجوى الدردير , الورك شوب كان عباره عن اساسيات وَ مبادئ الطله المناسبه لكل شخص ، كيف نعرف شكل جسمنا وَ الملابس المناسبه لها ، كيف نعرف لون بشراتنا وَ الالوان الي تخلي بشرتنا تشع وَ تكون اكثر ملائمه لنا ، استفدت من الورشه كانت عندي معلومات سابقه وَ الورشه عززتها وَ زادتني معرفه ، فحبيت انقل لكم بعض الاشياء الي تعلمتها من الورشه وَ بتكون اول خطواتنا انو نبدا نعرف نلبس الي يناسب اجسامنا وَ بشراتنا ، نبدأ بالاساسيات وَ بالبوستات الجايه بنتكلم عن الستايلات والتريندات يعني لازم نوضح بعض النقاط وَ هي قواعد اساسيه لازم كل شخص يعرفها.


الجمال وَ الاناقه مو بلبس غالي او قطع نادره ، هو ابرازك لاجمل مافيك بطريقه صح وَ مناسبه ♥ ، اول شي لازم نعرفه نوع جسمنا وَ كيف نغطي العيوب وَ نبرز الاشياء الجميله ، في ٤ مجموعات اساسيه وَ من الممكن تكونين مخلوطه بين مجموعتين بس شوفي تميلين لاي مجموعه اكثر ؟ عن نفسي انا من مجموعه الساعه الرمليه :

من اليمين الرمليه :
- عرض الاكتاف تقريبا نفس عرض الاوراك.
- الخصر اصغر من الصدر وَ الاوراك.
- الجسم كيرفي او عندك تضاريس ع قولتهم هههههههه.

جسم الكمثرى :
- الجسم يكون شكل مثلث يعني الصدر صغير بس الاوراك عريضه.
- عرض الصدر اصغر من عرض الاوراك.
- الاوراك عريضه.
- الوزن الزائد يكون دائما باسفل الجسم.
- غالبا معدتهم مسطحه.

جسم التفاحه :
- مثلث معكوس ( عكس جسم الكمثرى).
- قياس الصدر اكبر من قياس الاوراك.
- اغلب الوزن بيكون باعلى الجسم وَ الساقين وَ الوركين يميلون للضعف.

جسم الموزه :
- هو نوع يميل للهيئه الرياضيه.
- مستطيله الشكل.
- الخصر اصغر من الورك وَ الصدر.
- الجسم من فوق ومن تحت متناسق.
- فرقه عن الساعه الرمليه انو ماعنده تضاريس او صدر او اوراك بارزه.



عرفنا انواع الاجسام وَ ضروري هالشي اذا ماعرفتي تحددين نوع جسمك حاولي تسألين احد قريب او امشي ع كل نقطه بالانواع وشوفي ايش اكثر نقاط تشبهك بتعرفين نوعك ، ليش معرفه النوع مهم ؟ لان اللبس بيتأثر بالنوع .. في لبس معين حلو ع الموزه بس مو حلو ع الساعه الرمليه او مبين الاشياء الي مو حلوه فيها ، اذا متعقده انو لبسك يجنن وذوق بس مايناسبك اذا عرفتي انواع الجسم بتعرفين كيف تختارين الي مناسبك ان شاء الله. بتكلم بشكل مفصل عن ايش مناسب لكل نوع ببوست ثاني عشان افصل اكثر.

ثاني شي تكلمنا عنه انو الستايل الشخصي ينقسم لثلاث انواع :

١) رياضي ، خاص للناس العمليه الي تحب البساطه وَ السرعه وَ الملابس العمليه مثل الجينزات والتي شيرتات والاقطان وَ غيره بألوان كثيره وَ مرحه.

٢) الكلاسيك : خاص للناس الرسميه او تحب القصات الواضحه ، الملابس الي تميل للساده بدون نقشات او الوان كثيره ، شخص رسمي بعلاقاته وَ حياته ، يحب الالوان الغامقه او الفاتحه او الي نقدر نسيمها الالوان الرسميه وَ الاساسيه.

٣) الانثوي : خاص بالناس الانثويه ، الحالمه الي تحب الاناقه وَ النعومه وَ الالوان الهاديه.

هذي الاجزاء الاساسيه لانواع الموضه ، عن نفسي حسيت انو مو كافيه لاني ماندرج تحت ولا نوع احس انو مزيج من كذا نوع ، بس ينفع تميلين لنوعين من الانواع او اكثر ، الهدف من انو نعرف الستايل ، بتعرف شخصيه الي قدامك وَ كيف تعامله ، الناس الي تلبس رسمي هي شخصيتها رسميه ماتاخذ وَ تعطي ، الناس الي تلبس سبورتي وَ ملون شخصيتها ملوله تبي تروح وَ تجي ماتحب تقعد بمكان ، واخر نوع هو النوع الحنون الي يقدر يسمع لك ليل نهار ههههههه ، احس نفسي اميل لاخر نوع اكثر ، وَ الستايل بشكل عام يتأثر ب٤ اشياء :

المعتقدات ، الذكريات ، الاحاسيس ، الرغبات .. اذا حسيتي انو كنتي تحبين ستايل معين بس مليتي منه هذا معناته انو في شي جواتك تغير من الاربع هذا ، عن نفسي كنت اعششق اللبس المورد وَ الفساتين القصيره وَ غيرها ، شخصيتي خجوله وَ هاديه بس اخر سنتين حسيت ستايلي تغير بشكل كبير وَ صرت اميل للشي الي يلفت اكثر ، احب الستايل القديم صح بس ماصار يجذبني كثير ، اذا غيرتي ستايلك مو معناته انو شخصيتك تغيرت قد مو انو شي كان مرتبط فيك تغير ، مثلا كنت اكره الجماجم احسها جداااا تنرفز ومو انثويه ، واذكر بنت خالتي تعشقها ودايم اضحك عليها هههههه الحين كثير من اكسسواراتي جماجم ، بسبب انو حسيتها تعطي شي حلو للوك وَ تعبر عن شخصيتي بشكل ما.

اخر شي تكلمنا عنه انواع الوجه وَ البشرات والالوان الي تناسبها وَ تبرز جمال البشره ،

الالوان ترمز للفصول من فوق يسار (صيف) الي جنبه (خريف) من تحت يسار (شتاء) الي تحت يمين (ربيع)
الالوان وحده وهي اساسيه بس انتي اختاري درجه اللون الي تناسبك وَ تناسب بشرتك ، انا اكثر شي يناسبني الخريف وَ بفصل هالشي وكيف نعرف الاندرتون او سحنتنا ببوست ثاني ان شاءالله  ♥

وَ اخر شي كان انواع الوجه :

اذا عرفتي نوع وجهك بتعرفين قصه الشعر المناسبه لك وَ الاكسسوار الي يناسبك وَ من ناحيه الميك اب بتعرفين كيف تنحتين وجهك باستخدام الكونتور ، هذي الاساسيات الي تعلمتها بالورك شوب ، بتعطيني خط انطلاقه لتدويناتي الثانيه باذن الله ، بتكلم عن كل نقطه بشكل مفصل وعن اتيكيت اللبس بشكل عام ، وَ بحاول اساعد البنوتات بالي اقدر عليه ان شاء الله ، المطلوب منكم حاليا ، تشوفون كل نقطه وَ تحددون انتم تنتمون لايش ؟ اعرفو نوع جسمكم ولون بشرتكم وشكل وجهكم ،، حتى بالمرات الجايه يسهل تتعلمون كيف تبرزون جمالكم ، حابين نبدا بايش الاسبوع الجاي ان شاء الله ♥♥♥ ؟
بالنهايه اشكر استاذه نجوى لاتاحتها الفرصه هذي لنا ، للي حاب يتواصل معاها او يتابعها تويترها :
@Naldardeer
* جميع الصور من موقع نجوى الدردير وَ http://www.polyvore.com

وَ اخذو طله ع مدونه خلود الجميله ♥ تكلمت عن نفس الموضوع :
http://ar-stylish.blogspot.com/2013/03/blog-post.html

اتمنى استفدتو من الموضوع وَ عطونا حماسكم للتدوينات الجايه ان شاء الله لانها بتكون افضل وافضل ♥.♥

للتواصل معي ع التويتر والاسك -غيرت اللنك- والانستقرام الايكونز ع يمين الشاشه

لاتنسين الاشتراك بالمدونه ليصلك كل جديد ..

كونو دائما جميلين ♥ ..