روتيني بعد الشور | My after shower routine ♥

،

السلام عليكم وَ رحمة الله وَ بركاته

كيفكم يَ أحلى متابعات ؟

جوسي تسلم عليكم ، الحمدالله حصلت لها بيت يلمها p:

وَ أكثر شي مريحني إنها بأيدي أمينه بتهتم فيها وَ تحبها () 

اليوم البوست عن موضوع انطلب مني كثيييييير وَ حابه أهديه للبنوته الي طلبته مني بالاسك 

وَ أعتذر منها عَ تأخيري

إعتراف *

هالايام مره مقصره بحق نفسي من الاهتمام وَ كذا ، بشرتي تعبت كثير وَ نفسيتي إكس ماشي مليون لول

بس وعد برجع اهتم فيها مثل قبل وَ أحسن ، حبيت أعترف لكم بس أبين لكم مافي أحد بيرفكت !

مو لان دايم اتكلم عن البشره والميك اب وكل شي ، اني بكون مهووسه فيها و وااو فيها ..

أهتم صح بس مرات بيكون في تقصير ، مو غلط نوقف .. الغلط انو نستمر بالتوقيف p:

يعني البنوته الي تحس بشرتها مو حلوه او فيها عيوب بنفسها وَ تقول خلاص ليه اهتم مافي شي بيتغير

لا ياقلبي ، لنفسك عليك حق ! وَ ليه ماتهتمي ؟ يقولون بعلم النفس انو اذا استمريتي ع شي مده اسبوعين الى ٢٠ يوم

بيكون عاده متأصله فيك وَ بيصير شي روتيني ، فعشان كذا بس تحسين انو تكسيلتي أو مالك خلق ،

بس حاولي تقومين وَ تبدين تغسلين فيسك مثلا وَ بغمضه عين وَ إنتي مخلصه روتينك وَ حاسه بالرضا

يلا هذي كم كلمه اشجعكم وَ أشجع نفسي p:

تذكرون بوست الشور الي تكلمت عنه ، هذا أقدر أقول تكملته ..

كيف أرطب وَ أهتم بنفسي بعد الشور .. تقريبا هالطريقه داايماا بعد كل شور أستخدمها

الا اذا كنت مستعجله اختصر الخطوات ، يعني هالطريقه اقدر اقول ٣ مرات الى ٤ مرات بالاسبوع ..

- بشره وجهي مختلطه تميل للدهني وجسمي عادي -

أول شي بعد الشور ،

قبل لا أطلع من الحمام -وانتو بكرامه- اذا استخدمت سكرب لوش لازم استخدم المرطب الصلب

صوره قديمه له ، الي عَ اليمين من لوش اسمه each peach بعد ماخلص شور والجسم مبلل امرر المكعب على الجسم يرطب بشكل حلو : )

وَبعدين أطبطب بالمنشفه ع جسمي ، أرش مويه ورد عَ فيسي وَ جسمي كامل

- نسيت أصور بس مويه الورد معروفه حطوها بعلبه بخاخ وَ بالثلاجه -

بعد كذا يبدا الترطيب ،

عندي هالمرطبات الثلاثه حاليا ، في غيرهم وَ مفكره أسوي تدوينه عن المرطبات بشكل عام ان شاء الله : )

(١)

اول واحد من فازلين توحيد اللون ، هذي ثاني علبه اشتريها ..

مايوحد اللون ! اصلا ايش تنتظرون من منتج ب٢٧ ريال يسوي p:

بس كترطيب جممميل ، وريحته حلوه بعد .. لاحظت فازلين نزلو كذا منتج ترطيبي بس بعضهم روائح شينه!

هذا اللوشن فيه وقايه من اشعه الشمس فحلو لو بتطلعين برا البيت تستخدمينه ()

(٢)

ثاني واحد من دوف ، لوشن بزبده الشيا انا اي شي فيه شيا اخذه وانا مغمضه ..

احس ترطيبه روعه وَ تمتصه البشره بسسرعه .. وهو مخصص للبشره الجافه فحلو للشتا كترطيب عميق

انا بشره جسمي مو جافه بس تجيها حالات تستهبل هههههههه

منتجات دوف بدت تتطور ، قبل طايحه من عيني بس بعد ماستخدمت الشامبو حقهم حبيتهم : )

ريحته ريحه شيا وَ عن نفسي ماحب اللوشنات الي فيها روائح : (

بس الترطيب يشفع له ، بس ماينفع تستخدمونه وَ تطلعون بالشمس

لانه معطر وَ فيه ريحه فيسمر بالشمس!

(٣)

اخر واحد لوشن زبده الكيكاو من فازلين ، يمكن اكثر لوشن كنت استخدمه بس هالفتره كرهته كرهته : (

صاير فيه ريحه شيننه ! مدري ليه ، قلت يمكن الي عندي خرب مع انو احفظه بالدرج 

بس لما رحت السوبر ماركت طلعت نفس الريحه : \

جربو تشمونها قبل لاتشترون ، ترطيبه بطلللل وَ جمميل انصح فيه  ..

وَ في بعد زبده الكيكاو من فازلين الي بعلبه ، بس ماحصلتها مختفيه من كل مكان هههههه

بس بعد ماكرهت الريحه بطلت ادوره ، لو حابين اكسترا ترطيب جربوه 

* عَ الهامش :

جربت احط لوشن فازلين بيد وَ دوف بيد وخليتهم ساعه وَ لمست يدي حسيت 

ترطيب الفازلين احلى من دوف  ،

* طريقه وضع اللوشن :

تحطين بيدك وَ تدفينه مدري كيف اشرحها :\ بس تفكرينه بيدك لحد مايدفا وَ بعدين وزعيه عَ الجسم

بعد كذا يجي دور البايو اويل ، مكتوب عليه

انو يوحد اللون \ يرطب \ يوخر السترش ماركس \ العلامات الي سببها الحروق او الجروح

هالكلام يبين بعد استخدام ٣ شهور فماقدر احكم عليه !

بس احطه ع الركب وَ الاكواع وَ الاماكن الي احس خشنه بالجسم

بعدين يجي دور مرطب QV 

هو مرطب عااالي وَ ثقيل ، استخدمه نفس الشي للاكواع والركب والاماكن الخشنه الي يبيلها ترطيب مضاعف

ومنطقه البكيني ماحط عليها مرطب عطر غلط مره ،

بما انو هالمرطب خالي من العطور وثقيل فحلو استخدمه للمنطقه هذي 

وَ مرات اخلطه مع البايو اويل لان احس دهني بزياده ! وَ ماحب احساس التدهن بالجسم p:

وَ مرات احطه وَ احط فوقه البايو اويل او اكتفي بواحد منهم

* ليش ماكتفيت باللوشن وَ بس ؟

اللوشن خفيف جدا ، صح يرطب بس هالمناطق يبيلها كريم ثقيل لترطيب افضل ..

فرقو بين الكريم واللوشن ، الكريم ثقيل وماتمتصه البشره بسرعه بس كترطيب عالي

عكس اللوشن الي خفيف وَ يرطب وَ تمتصه البشره افضل ..

بعد كذا احط كريم مرطب للاندر ارمز -الابط-

قبل كنت استخدم ديودرنت عطري من السوبر ماركت وَ سمر لي منطقه الابط !

فتركته وَ استخدمت ديودرنت غير معطر من فيشي وَ بيزلين

وَ خليت له مرطب خاص اسمه بيثانين من الصيدليه تحصلونه

طبعا ماستمريت عليه شكرا ياأنا بس خلاص بهجد وَ استمر عليه ان شاء الله 

احط شوي من البيثانين وَ بس تمتصه البشره احط الديودرنت

البيثانين مرطب طبي وَ حلو للمنطقه هذي : )

*الي بالصوره من بيزلين بريحه الروز بس مكتوب عليه ينور المنطقه*

لبشرتي احط مرطب عادي اي شي قدامي :$

حاليا استخدم كلينك ، اشتريته مع التونر والغسول جمميل وَ خفيف ع البشره وَ خلصته !

وَ أحط تحت عيوني مرطب بوبي براون للهالات extra eye repair، احبه وَ أحس خفف هالاتي وَ بستمر عليه ان شاء الله ()

وَ أحط مرطب الشفايف في كذا واحد اختار الي قدامي p:

اخر شي بالترطيب الرجل ، حاليا استخدم مرطب همالايا 

مرره جميل هالكريم استخدمت قبلها نيتروجينا صغيير وَ مايسوي شي :|

اما همالايا ينعم الرجل بشكل حلو ، حبيته :*

وَ البس شرابات اكيد !

وَ اليد استخدم لها مليون طعش الف كريم ، افكر اكتب تدوينه خاصه لليد وكريماتها :|

بس حاليا من نيتروجينا كريم اليدين المركز ، ثقيل بس استخدمه وانا ماوراي شي

وَ أكره نفسي اذا حطيت كريم وَ أضطر اغسل يدي اع اع :((

وَ بعد كذا انشف شعري بَ المنشفه وَ أحط من زيت المكديميا ع اطراف الشعر بس !

حلو للتقصفات وَ يرطب الاطراف وَ ريحته تجنن :")

وَ أنشف شعري بالاستشوار وَ أمشطه أكيد p:

أخر شي أحط البودي سبلاش أو معطر الجسم الخفيف 

عَ حسب الشور جل الي استخدمته ، هذا من باث اند بودي وركس حلو وَ ريحته خفيفه 

ps I love you اسمه

وَ احط مسك سائل من عبدالصمد القرشي ، متى أحس اني نظيفه وَ أهبل اذا حطيته هههههههههه

المشكله اشتريته من تجهيزي ولا اذكر الاسم او السعر !

بس لان اخذت كثاار وَ اغلبهم خلصته مابقا الا هذا ، بس الي اذكره انو مسك سائل ابيض

ومسك العروس ، واخذت بالتولات ، احطه تحت اذني اماكن النبض

تحت الاندر ارمز بس مو على المنطقه نفسها لا تحتها

عند ثنيه الرجل وَ اليد ، نظااافه وانتعااااش : ")

ان شاء الله لارحت جبت منهم شي جديد بتأكد من الاسعار والاسامي

وأخر شي ألبس وَ أتعطر من عطري المفضل 

كتبت تدوينه كامله عن عطوراتي المفضله ( http://igorgeousta.blogspot.com/2012/10/my-perfumes-collection.html )

وَ بعد كذا استمتعو بالنظافه وَ النعومه : )

صح كلامي كثير بس ماياخذ وقت ابد! واذا جربتو الطريقه هذي بتدمنونها وَ مابتحسون اخذتو شور جد الا لما تجبربونها

ممكن الطريقه تتغير او تنضاف لها اشيا بس بالنسبه لي هذي الاساسيات الي ماشيه عليها 

اعطي كل شي من جسمي حقه ، الاسعار بذكرها تحت :*

ان شاء الله عجبكم البوست ، وَ إنتظروني ببوستات أحلى

مفكره البوست الجاي يكون عن الميك اب زمان عنه! ولا شرايكم ؟ 

للتواصل معي أو استفسارات أو ملاحظات :

| |

الايميل :

gorgeousta@gmail.com

وَ الي حاب يوصله كل جديد يقدر يشترك بالمدونه بالضغط ع الزر الاشتراك الموجود ع يمين الصفحه

كونو دائما جميلين \ قورجس

الاسعار وَ أماكن الشراء:

- فازلين الموحد من الدانوب او بنده - ٢٧ ريال

- دوف من بنده - ناسيه سعره بس تقريبا ١٧ ريال

- فازلين زبده الكيكاو - ناسيه السعر :$ بس الصغير اقل من ٢٠ ريال ممكن

- البايو اويل من صيدليه بوتس - الحبتين ب٢١٠ ريال

- مرطب ال QV من صيدليه بوتس - ٨٥ ريال

- مرطب لوش من لوش المملكه ب ٦٥ ريال

- بوبي براون من بوبي براون البحرين - ب ٣٥٥ ريال وتقدرون تحصلونه بالهارفي نيكلس بالفيصليه

- كريم اليد والرجل ناسيه الاسعار بس اقل من ٢٥ ريال من اي سوبر ماركت

- بيثانين من اي صيدليه ب١٣ ريال تقريبا

- مرطب كلينك اخذته مجموعه كامله ب٣٨٠ ريال تقريبا من باريس قاليري

- زيت المكديميا اخذته مع مجموعته الميني من نزيه ب١٢٠ ريال تقريبا

* اهم شي كل شي عندي تقريبا :\ فاشله بالحفظ صح!!