صور مكتبي الخاص | My own space ♥

-

السلام عليكم يَ جميلاتي ♥♥

قبل فتره سويت مكتب خاص فيني بما انو الشغل وَ حوستي زادت

فكل مره تحصلوني انا وَ لابتوبي ندور مكان يضفنا وَ مريح p:

في بيتي وَ تحديدا غرفه تبديل الملابس في مكتب بس مسحوب عليه

شكله كئيب وَ مايحمس أحد يطالع فيه حتى :|!!

من أخر بوست عرفتو ذوقي ، أميل للبساطه وَ الالوان البنوتيه ..

التخطيط للمكتب كان عشوائي صراحه :|

شفت فيديوهات وَ بلوقات كثيره كثيره وَ قبل يومين انطلقت لايكيا

مو حاطه ببالي شي ابد ههههههههه لان اعرف لو حطيت شي ببالي مابحصله فريحت نفسي

ليش ايكيا ؟ 

مافيه شي مميز ادري وَ الكل متعود عليه وَ حافظين منتجاته ، بس الستايل الي ابيه 

مابحصله الا هناك !

مثل ماقلت المكتب موجود من زمان وَ مرره بسيط ،

عباره ع زاويه ع امتداد جدارين جزء مكتب وَ جزء تسريحه لي او تواليت

لونه ابيض وَ فوقه زجاج للحفاظ عليه ! الزجاج بهذلني صراحه :|

لان يجي مثل البقع الي بين الزجاج والخشب وماقدر انظفه -__-

بس مو مشكله احاول اغض النظر عنها :$

المكتب طاوله فيها دروج يمين وَ يسار ، وفي مكان فاضي مدري شسميه

بس مثل الدرج مفرغ وَ فيه اناره ، التصميم تصميم خاص وَ مسوينه بمنجره

أحد من أهلي ، بس مافيه شي مميز اي مكان يقدر يسويه يعني p:

تغيري كان بس اكسسواريز وَ اضافات تحلي المكان وَ يفتح نفسي اكتب لكم تدوينات وكذا p:

*بحاول قد ماقدر ماكتب كلمات انقلش مثل ماطلبو مني بعض البنات :$*

واي كبرت الخط بناء ع طلب كم بنوته بعد لو في طلبات ثانيه قولولي ههههههه

الثيم ماقدر اعطيه اسم بس اقدر اقول سيمبل = بسيط

بوريكم الصور الي قبل وَ ترا حوسسه لان مارتبت عشان اصور كنت مو فاضيه تو جبت اشيائي وَ متحمسه ارتبهم ههههههههه

نظره عامه ههههههههههه

غضو النظر عن النشا p: الغرفه هي مكتب هي مخزن هي تبديل هي كوي

يعني كل شي ههههههههههههه

يلا نجي للنيولوك ، *ماشاء الله لاحول ولاقوة الا بالله*

صورتها أمس بالليل 

هذي الصباح p:

المخده من ايكيا ، كبيره ادري بس مريحه لان الكرسي بلاستيك مو مريح :|

على يمين المكتب

 ، زرعه صناعيه ، البزنس كارد حقتي ، ايطار فيه اقتباس احبه

أبجوره للقراءه ، وَ تعليقه اوراق من هيلو كيتي ، حطيتهم بصحن مدري شسميه صراحه :|

بس خشبي ، تحصلونه بايكيا قسم المزروعات .. حبيت فكرته معطي شكل للمكان !

تعليقه هيلو كيتي من محل هيلو كيتي نفسه بالبحرين : )

تفاصيل :

الاقتباس :

"أحلم من دون خوف ، أحب من دون حدود" ماعرف لمين الاقتباس بس حبيه كثير 

وَ حلو انو دايما قدامي يعطيني دفعه معنويه :")

على يسار المكتب ،

كتب keep calm اخذتها من جرير هذي الي امس تكلمت عنها ،

فيها اقتباسات بالانقلش عن كل شي ، حلوه كديكور بعد p:

مزهريه انتيكه !! حبيتها جدا بس ابدا ماطفشتني مدري وين احطها -___-

تحصلونها بسنتر بوينت ، ونوتي الكيوته وَ اوراق وقلم رصاص وورا اللوحه الي اعلق فيها 

اوراقي وكل شي ابي اشوفه قدامي ! كان فكرتي انو اجيب خام مورد والبس اللوحه

تعطي شكل حلو ، دورت وماحصلت *اعترف مادورت كثير* بس قلت انا كذا ولا كذا

بملاها اوراق فماراح يبين شي فرضيت بالامر الواقع p:

تفاصيل :

هنا غيرت مكان الورد والنوتات ، بس مو مقتنعه للان! 

بخليها لبعدين ادور لها فكره ثانيه ..

فوق المكتب رف ، حطيت فيه ابجورتين من ايكيا مع شمعه

كتبي وفوقها حبيبتي هيلو كيتي هههههههه

صحن وفيها ورده صغنونه وحولها مثل الصدف له ريحه تجنن

من ايكيا بعد!!

الابجورات رفعتهم لان انارتهم مزعجه شوي ..

مو راضيه تماما عن الرف بس بدور له صرفه بعدين بعد p:

ع يسار المكتب جدار فاضي فحبيت احط ايطارات

ع اليمين بالليل وعلى اليسار الصبح p:

الايطارات من ايكيا بعد !

الاناره ترا تلعب دووووور بالمكااااان وَ تجمله !

يمكن مو واضح بالصور بس مره تأثر :)

نبدا من فوق :

اخذوني لباريس p:

خليكم كلم وصيرو جميلين p:

اخر صوره شعاري () الاوراقق طباعه A4 عاديه بس بالايطار معطيها شكل :")

وَ بس هذا مكاني الخاص الي حبيت اشاركم فيه ..

اخذ مني حول يومين او اقل ، جا بشكل عشوائي بس حبيت النتيجه :*

احب الديكور وكل شي يتعلق فيه ، احس يعبر عن الشخصيه ..

فممكن شفتو جزء من شخصيتي بمكاني الخاص ..

التكاليف وكل شي بحطه بعدين مضيعه الفاتوره :$

حتى لو ماعجبكم بليز ماشاء الله ..

الأسعار:
كتب كيب كالم من مكتبه جرير ب٣٥ ريال الحبه
الصحن الخشبي الي بالزاويه من ايكيا ب٥٥ ريال
المخده من ايكيا ٧٥ ريال
الايطار الصغير ب١٥ريال
الايطارات الكبيره ب٢٩ ريال للحبه
الاحجار والورد المجفف ب١٢ ريال
النبته الصناعيه ب١٧ ريال
الحاويه تبع النبته الصناعيه ب١٢ ريال
النبته البيضا بفازه زرقا من هوم سنتر ب٥٥ او اقل

هذي كل الاسعار ان شاء الله ماكون غلطت بشي :$
اشوفكم ع خير حبيباتي ()

كونو جميلين دائما \ قورجس ××

أي أسئله أو استفسار التويتر أو الانستقرام أو حتى الايميل مفتوح للجميع

 |  |  |